Májilis Biryńǵaı ekonomıkalyq keńistik aıasynda gaz tasymaldaý salasyndaǵy máselelerdi qamtyǵan jobany maquldady
ANA. 30 naýryz. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary
«Baǵa belgileý men tarıftik saıasat negizderin qosa alǵanda, gaz tasymaly júıeleri arqyly gaz tasymaldaý salasyndaǵy tabıǵı monopolııalar sýbektileriniń qyzmetterine qol jetkizý qaǵıdattary týraly kelisimdi ratıfıkatsııalaý týraly» zań jobasyn maquldady.
Atalǵan kelisimge 2010 jylǵy 9 jeltoqsanda Máskeý qalasynda qol qoıylǵan bolatyn. Zań jobasy boıynsha baıandaǵan Munaı jáne gaz mınıstri Saýat Myńbaevtyń aıtýynsha, kelisimniń maqsaty Biryńǵaı ekonomıkalyq keńistikke qatysýshy memleketterdiń qajettilikterin qanaǵattandyrý úshin baǵa belgileý men tarıftik saıasatty qosa alǵanda gaz tasymaldaý salasyndaǵy tabıǵı monopolııalar sýbektileriniń qyzmetterine qol jetkizý qaǵıdattaryn belgileý bolyp tabylady. Osyndaı sharany qamtý kezinde taraptar birqatar negizgi qaǵıdalarǵa súıenetin bolady. «Atap aıtsaq, ózara saýdada kedendik ákelý jáne áketý bajdaryn taraptardyń qoldanbaýy qarastyrylady. Birinshi kezekte BEK qatysýshy memleketterdiń ishki gazǵa qajettilikterin qamtamasyz etý kózdeledi. Sonyń ishinde, taraptar memleketteriniń ishki qajettiligin qanaǵattandyrý úshin gaz tasymaldaý tarıfteri taraptar memleketteriniń ulttyq zańnamasyna sáıkes belgilenetin bolady. Biryńǵaı ekonomıkalyq keńistikke qatysýshy memleketterdiń gazǵa normalary men standarttary birizdendirilip, ekologııalyq qaýipsizdik udaıy nazarda bolady», - dedi mınıstr.
Bul rette Biryńǵaı ekonomıkalyq keńistikke qatysýshy barlyq memleketterdiń aýmaqtarynda gazǵa naryqtyq (teń kiristi) baǵaǵa 2015 jylǵy 1 qańtardan keshiktirmeı qol jetkizý qamtamasyz etiledi. Sonymen qatar, Qazaqstan tarapy Qazaqstan Respýblıkasynyń aýmaǵynda gaz satýdyń baǵasyn Reseı Federatsııasynyń aýmaǵyndaǵy gaz baǵasymen salystyrmaly deńgeıge deıin kezeń-kezeńimen kóterýdi qamtamasyz etedi.
Májilis maquldaǵan zań jobasy Parlament Senatyna jiberiledi.
