Májilis birqatar zań jobalaryn qarastyrýdy bastady
NUR-SULTAN. QazAqparat – Parlament Májilisi «Qazaqstan Respýblıkasynyń Memlekettik shekarasy týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyn qarastyrýdy bastady, dep habarlaıdy QazAqparat tilshisi.
«Zań jobasy bir top Májilis jáne Senat depýtattarynyń bastamasymen ázirlenip, memlekettik shekarany qorǵaý boıynsha zańnamany jetildirýge baǵyttalady. Zań jobasy quqyq qorǵaý ári arnaýly organdary qyzmetkerleriniń ótkizý pýnkterinde bolý tártibin retteýdi, sondaı-aq shekara qyzmetiniń qajetti ınjenerlik-tehnıkalyq quraldary, qurylys-jaılary men bógeýishterdi ornatý jónindegi quzyretin naqtylaýdy qarastyrady», - dedi depýtat Muhtar Erman Májilistiń jalpy otyrysynda.
Aıta keteıik, Májilistiń Halyqaralyq ister, qorǵanys jáne qaýipsizdik komıteti zań jobasy boıynsha 2020 jylǵy 23 jeltoqsanǵa deıingi merzimde qorytyndy ázirleıtin bolady.
Budan bólek, depýtattar «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobasyn talqylaýdy bastady.
«Elimizdegi advokattyq qyzmet jáne zań kómegi máseleleri boıynsha zańnamany jetildirý maqsatynda Parlament depýtattarymen ázirlendi. Zań jobasy Konstıtýtsııanyń 13-babynda kózdelgen azamattardyń bilikti zań kómegin alý quqyǵyn iske asyrý kepildikterin arttyrýǵa baǵyttalǵan. Komıtet atalǵan zań jobasy boıynsha 2021 jylǵy 26 qarashaǵa deıin qorytyndy ázirleýge daıyn», - dedi Májilistiń Zańnama jáne sot-quqyqtyq reforma komıtetiniń tóraǵasy Nurlan Ábdirov.
Munymen qosa, Májiliste «Qazaqstan Respýblıkasynyń keıbir zańnamalyq aktilerine jyljymaıtyn múlikke quqyqtardy jáne zańdy tulǵalardy memlekettik tirkeý máseleleri boıynsha ózgerister men tolyqtyrýlar engizý týraly» zań jobasyn qarastyrý bastaldy.
«Atalǵan zań jobasy qoldanystaǵy jyljymaıtyn múlikke quqyqtardy jáne zańdy tulǵalardy memlekettik tirkeý salalaryndaǵy zańnamany jetildirý maqsatynda Parlament depýtattarymen ázirlendi. Zań jobasy jyljymaıtyn múlikke quqyqtardy tirkeý merzimin buzǵany úshin ákimshilik jaýaptylyqty alyp tastaý, nysannyń buzylýyn rastaıtyn qujattardy rásimdeý tetikteri men merzimderin belgileý, quqyqtyq kadastrdyń aqparattyq júıesin jáne ýákiletti organdar men uıymdardyń aqparattyq júıelerin yqpaldastyrý jolymen málimet alý máselelerin ári basqa da suraqtardy retteýdi kózdeıdi», - dedi N. Ábdirov.
