Májilis birqatar konstıtýtsııalyq zańdarǵa engizilgen ózgeristerdi maquldady
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir konstıtýtsııalyq zańdaryna ózgerister engizý týraly» Qazaqstan Respýblıkasy Konstıtýtsııalyq zańynyń jobasyn ekinshi oqylymda maquldady. Atalǵan zań jobasy búgingi otyrysta maquldanǵan Qylmystyq is júrgizý kodeksiniń ilespe qujaty bolyp tabylady.
Zań jobasy qoldanystaǵy zańnama normalaryn Qylmystyq is júrgizý kodeksiniń jobasymen sáıkes keltirýge, sondaı-aq qylmystyq protsesti odan ári jetildirýge baǵyttalǵan. Bul rette «Qazaqstan Respýblıkasyndaǵy saılaý týraly», «Qazaqstan Respýblıkasynyń Parlamenti jáne onyń depýtattarynyń mártebesi týraly», «Qazaqstan Respýblıkasynyń Konstıtýtsııalyq Keńesi týraly», «Qazaqstan Respýblıkasynyń Tuńǵysh Prezıdenti - Elbasy týraly» jáne «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń konstıtýtsııalyq zańdaryna túzetýler engizilip otyr.
Májilis depýtaty Ramazan Sárpekovtiń sózine qaraǵanda, ózgerister atalǵan konstıtýtsııalyq zańdardy qoldanýda quqyqtyq qaıshylyqtar men olqylyqtardyń oryn almaýyn qamtamasyz etedi. Jalpy, zań jobasy qabyldansa azamattardyń quqyqtary men bostandyqtaryn, qoǵam men memlekettiń múddelerin qylmystyq qolsuǵýshylyqtan tıimdi qorǵaý qamtamasyz etiledi. Sonymen qatar, qujat tutastaı alǵanda zańdylyq, demokratııalyq jáne bılikti bólý qaǵıdatyna nuqsan keltirmeıdi.
Budan bólek, depýtattar «Qazaqstan Respýblıkasynyń keıbir zańnamalyq aktilerine qylmystyq is júrgizý zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn da ekinshi oqylymda maquldady. Zań jobasynyń maqsaty qoldanystaǵy zańnamanyń normalaryn Qylmystyq is júrgizý kodeksiniń jobasyna sáıkes keltirý, sondaı-aq qylmystyq protsesti odan ári jetildirý bolyp tabylady. Osyǵan oraı, Qazaqstan Respýblıkasynyń otyz toǵyz zańnamalyq aktisine túzetýler engiziledi.
