Májilis bıootyn óndirisi men onyń memlekettik aınalymyn retteý týraly zań jobasyn úshinshi oqylymda maquldady

Endi qujat Parlament Senatynyń jalpy otyrysyna jiberiledi, dep habarlaıdy QazAqparat.

Esterińizge sala keteıik, zań jobasynyń negizgi maqsaty bıootyn óndirisin jáne aınalymyn damytý, bıotyn óndirisi kezinde memlekettiń azyq-túlik qaýipsizdigin qamtamasyz etý máselelerin retteý, sondaı-aq qorshaǵan ortany qorǵaý bolyp tabylady. Toqtala ketetin jaıt, buǵan deıingi ekinshi oqylym barysynda birqatar depýtattar bıdaı sekildi azyq-túlik daqyldaryn bıootyn óndirisi úshin paıdalanýǵa qarsy shyqqan bolatyn. Jumys toby men palata depýtattarynyń arasyndaǵy oryn alǵan birshama qaıshylyqqa qatysty zań jobasyn úshinshi oqylymǵa ázirleý tapsyrylǵan edi. Úshinshi oqylymǵa ázirleý barysynda palata depýtattary tarapynan tek azyq-túlik qaýipsizdigine qater tóngen jaǵdaıda ǵana bıootyn óndirisi kezinde tamaq shıkizatyn paıdalanýǵa kvotalardy Úkimettiń belgileýi jónindegi normalardy saqtaý qajettigine baılanysty 3 jazbasha eskertpe túsken. Sonymen birge, 3-synypty bıdaıdy bıootyn óndirisi kezinde paıdalanýǵa tyıym salýdy belgileýge qatysty sheshim jumys tobynda ózgertilmegen.

Jalpy, atalǵan zań jobasyn qabyldaý, bıootyn óndirisi jáne aınalymy kezinde týyndaıtyn qoǵamdyq qatynastardy retteýdi qamtamasyz etýge jáne quqyqtyq, ekonomıkalyq, uıymdastyrý jaǵdaılaryn aıqyndaýǵa múmkindik beredi. Aıta ketý kerek, qujatta Ákimshilik quqyq buzýshylyq týraly kodekske ákimshilik jaza sharalaryn qoldaný jáne bıootyn óndirisi jónindegi áreketti toqtatý bóligine, «Etıl spırti men alkogol óniminiń óndirilýin jáne aınalymyn memlekettik retteý týraly» zańǵa, osy zańnyń bıootynǵa áreketiniń ara-jigin ajyratý bóligine ózgerister engiziledi.

Májilis maquldaǵan zań jobasy Parlament Senatyna jiberiledi.