Májilis bıologııalyq qaýipsizdik týraly zań jobasyn maquldady

NUR-SULTAN. QazAqparat – Búgin Májilistiń jalpy otyrysynda «Qazaqstan Respýblıkasynyń bıologııalyq qaýipsizdigi týraly» zań jobasy maquldanyp, Senat qaraýyna jiberildi, dep habarlaıdy QazAqparat tilshisi.

Atalǵan qujat boıynsha baıandama jasaǵan Darhan Myńbaıdyń aıtýynsha, zań jobasyn pysyqtaý barysynda depýtattar qujattyń mazmunyn, jalpy sapasyn jaqsartatyn túzetýler engizdi. Onyń ishinde:

- bıologııalyq qaýipsizdik salasyndaǵy qyzmetti júzege asyratyn memlekettik organdardy, olardyń quzyretteri men ókilettikterin naqtylaý boıynsha túzetýler qabyldandy;

- bıologııalyq qaýipsizdik salasyndaǵy talaptardyń saqtalýyn memlekettik baqylaý jáne qadaǵalaý tetikterin jetildirý maqsatynda zań jobasy jedel den qoıý sharalaryn qoldaný tártibin retteıtin jańa bappen tolyqtyryldy;

- aqparat almasý bóliginde bıologııalyq qaýipsizdik salasyndaǵy halyqaralyq yntymaqtastyqtyń basymdyqtary men baǵyttary, olardy oqshaýlaý men joıýǵa qatysý júzege asyrylatyn tótenshe jaǵdaılardyń túrleri naqtylandy;

- patogendi bıologııalyq agenttermen jumys isteýge ruqsat berý, bıologııalyq qaýipsizdik salasyndaǵy esepke alý jáne monıtorıng tetikteri naqtylandy;

- bıologııalyq qaterdiń týyndaý jáne olardy joıý jaǵdaılarynda qoldanýǵa arnalǵan dárilik zattardy, preparattar men medıtsınalyq buıymdardy jedel memlekettik tirkeý múmkindigi kózdelgen;

- patogendi bıologııalyq agentterdi jikteý krıterııleri naqtylandy;

Adamdardyń, janýarlar men ósimdikterdiń aýrý jaǵdaılaryn bıologııalyq qaterlerge jatqyzý máselelerin retteıtin normalar pysyqtaldy. Atap aıtqanda, adamdardyń, janýarlar men ósimdikterdiń aýrýy boıynsha naqty qandaı statıstıkalyq jáne eseptik derekterdiń artýy eldiń bıologııalyq qaýipsizdigine qaýip tóndiretini naqtylandy.

«Sondaı-aq, zań jobasynyń normalaryn Qazaqstan Respýblıkasynyń zańnamasyna sáıkes keltirý maqsatynda túzetýler, redaktsııalyq sıpattaǵy túzetýler engizildi. Jumys tobynyń 20 otyrysy, sondaı-aq bas Komıtettiń 2 keńeıtilgen otyrysy ótkizildi. Salystyrmaly keste qabyldanǵan 307 pozıtsııadan turady. Májilistiń barlyq komıtetteri zań jobasy boıynsha oń qorytyndylaryn berdi», - dedi Darhan Myńbaı.

Osydan keıin depýtattar «Qazaqstan Respýblıkasynyń bıologııalyq qaýipsizdigi týraly» Qazaqstan Respýblıkasy Zańynyń jobasyn ekinshi oqylymda maquldap, Parlament Senatynyń qaraýyna jiberdi.