Májilis: Bekbolat Tileýhannan basqa eshkimnen koronavırýs anyqtalǵan joq
NUR-SULTAN. QazAqparat - Májilis koronavırýs ınfektsııasynyń taralmaýy úshin barlyq qajetti sharany qabyldaıdy, dep habarlaıdy QazAqparat Májilistiń baspasóz qyzmetine silteme jasap.
«Májilis koronavırýs ınfektsııasynyń taralmaýy úshin barlyq qajetti sharalardy qabyldaýda. Alaıda, koronavırýs ınfektsııasyn anyqtaýǵa arnalǵan test Májilis depýtattarynyń birinde oń nátıje kórsetti. Qazirgi ýaqytta depýtat Bekbolat Tileýhannan ınfektsııa anyqtalyp, ol qajetti emdeý kýrsyn qabyldaýda. Májilis depýtaty ınfektsııa anyqtaǵanǵa deıin qashyqtan jumys isteý rejıminde bolǵan. Búgingi tańda depýtattyq korpýstan da, Apparat qyzmetkerlerinen de atalǵan aýrý belgileri anyqtalǵan joq», delingen habarlamada.
Depýtattarǵa karantınniń alǵashqy kúnderinen bastap, Májilis ǵımaratynda jalpy otyrys kúnderi, sondaı-aq negizgi zań jobalary boıynsha komıtetter men jumys toptarynyń otyrystarynda ǵana kelýge keńes berilgen.
«Osy turǵyda, jasy 65-ten asqan Májilis depýtattary qashyqtyqtan jumys isteý rejımine ótti. Barlyq jalpy otyrystar onlaın rejıminde taratylýda. Jumys toptarynyń jetekshileri zań jobalary boıynsha jumysty baılanystyń qazirgi túrleri aýdıo-vıdeo konferentsııalar, konferentsııalyq qońyraýlar jáne t.b.arqyly uıymdastyrýda. Májilis ǵımaratynda karantınniń alǵashqy kúnderinen bastap koronavırýstyq ınfektsııanyń taralýyn boldyrmaıtyn saqtyq sharalary engizildi», delingen habarlamada.
Epıdemıologııalyq baqylaý úshin ǵımarattyń kireberisteri sensor dene qyzýyn ólshegish jáne antıseptıkpen jabdyqtalyp, ǵımarat dezınfektsııalyq quraldarmen óńdelip, maskalyq tártip qatań saqtalýda. áApparat qyzmetkerleri arasyndaǵy áleýmettik qashyqtyq ornatylyp, olardyń 80%-y qashyqtaǵy jumys tártibine aýysty. Sonymen qatar, jalpy otyrysqa qatysatyn Májilis depýtattary jáne apparat qyzmetkerleri únemi koronavırýstyq ınfektsııaǵa qarsy testiler tapsyrady», delingen habarlamada.
