Májilis «Baıqońyr» keshenin Reseıge jalǵa berý merzimin 2050 jylǵa deıin uzartý týraly kelisimdi maquldady
ASTANA. Naýryzdyń 3-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasy men Reseı Federatsııasy arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn maquldady,
dep habarlaıdy QazAqparat.
Atalǵan kelisim aıasynda «Baıqońyr» ǵarysh aılaǵynyń ınfraqurylymyn jańǵyrtýdyń jáne onyń tarıhı mańyzy bar nysandaryn saqtaýdyń mańyzdylyǵy tanylady.
«2004 jyldyń qańtarynda Astana qalasynda Qazaqstan men Reseı Prezıdentteri qol qoıǵan bul kelisimniń «Baıqońyr» keshenin damytý men tıimdi qoldaný úshin mańyzy óte zor. Qujat boıynsha «Baıqońyrdaǵy» ekijaqty yntymaqtastyq odan ári damı túsedi, ǵarysh keshenin sapaly jańa deńgeıge kóterý kózdeledi. Atap aıtqanda, eki memleket basshylary osy máselege qatysty jańa mindetter júktegen bolatyn. Ol boıynsha qazaqstandyq jáne reseılik mamandar men uıymdar birlesken jobalardy iske asyrýǵa birdeı sharttarmen qatysatyn bolady. Sonymen birge, «Baıqońyr» zymyran-ǵarysh keshenindegi ekologııalyq qaýipsizdikti qamtamasyz etý mindetteri de jańa deńgeıde qoıylatyn bolady. Qorshaǵan ortany qorǵaý problemalaryn sheshý jóninde birlesken jumystar júrgizý qajettigi qarastyrylady», dedi zań jobasy boıynsha baıandaǵan QR Ulttyq ǵarysh agenttiginiń tóraǵasy Talǵat Musabaev.
Onyń aıtýynsha, kelisim aıasynda zymyrandyq otyn retinde joǵary ýytty komponentterdi paıdalanatyn zymyran tasyǵyshtardy satylap qysqartý sharalary kózdelip otyr. Bul baǵytta «Baıqońyr» ǵarysh aılaǵynda ekologııalyq qaýipsizdiktiń joǵary deńgeıin qamtıtyn «Báıterek» zymyran-ǵarysh keshenin qurý sharalary da qarastyrylǵan. «Osylaısha, Kelisimniń «Baıqońyr» keshenin damytý úshin mańyzdylyǵy zor bolyp tabylady ári qujat Qazaqstannyń ǵarysh salasynyń satylap qalyptasýyna septigin tıgizedi. Bundaı qadam buǵan deıin Qazaqstanda bolǵan emes», dedi T. Musabaev.
Kelisim boıynsha «Baıqońyr» keshenin Reseıge jalǵa berý merzimi 2050 jylǵa deıin uzartylady.
Májilis maquldaǵan zań jobasy Parlament Senatyna jiberiledi.
