Májilis básekelestiktiń biryńǵaı qaǵıdalary týraly kelisimdi maquldady
ASTANA. 8 maýsym. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Básekelestiktiń biryńǵaı qaǵıdattary men qaǵıdalary týraly kelisimdi ratıfıkatsııalaý týraly» zań jobasyn maquldady.
Básekelestiktiń biryńǵaı qaǵıdattary men qaǵıdalary týraly kelisim 2010 jylǵy 9 jeltoqsanda Máskeýde Keden odaǵyna qatysýshy memleketter arasynda jasaldy. Kelisimniń maqsaty Keden odaǵyna qatysýshy memleketterdiń biryńǵaı keden aýmaǵynda Taraptardyń taýarlardyń, kórsetiletin qyzmetterdiń jáne kapıtaldyń erkin qozǵalysyn, ekonomıkalyq qyzmettiń erkindigin jáne taýar naryqtarynyń tıimdi jumys isteýin, Taraptardyń básekelestik saıasat salasyndaǵy zańnamasyn úılestirýdi qamtamasyz etý jáne Taraptardyń ózara saýdaǵa teris áser etýge qabiletti is-qımylǵa jol bermeýi úshin biryńǵaı básekelestik saıasatty qamtamasyz etý bolyp tabylady. Kelisimniń nysanasy Taraptardyń aýmaǵynda básekelestikke qarsy is-qımyldy anyqtaý ári onyń jolyn kesý jáne eki nemese odan da kóp Taraptardyń aýmaǵynda básekege teris áser etetin is-qımylǵa jol bermeýdi qamtamasyz etetin básekelestiktiń biryńǵaı qaǵıdattary men qaǵıdalaryn belgileý bolyp tabylady.
Keden odaǵynyń Komıssııasy Biryńǵaı ekonomıkalyq keńistikte básekelestiktiń biryńǵaı qaǵıdalaryn saqtaýdy baqylaý salasyndaǵy ýákiletti organ bolyp tabylady.
Májilis maquldaǵan zań jobasy Parlament Senatyna jiberiledi.
