Májilis básekelestik máseleleri boıynsha Senat engizgen ózgeristerge qoldaý bildirdi
ASTANA. 6 aqpan. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine básekelestik máseleleri boıynsha ózgerister men tolyqtyrýlar engizý týraly» zań jobasyna Parlament Senaty engizgen ózgeristerdi qarady.
Zań jobasynda elimizdiń qoldanysta júrgen birqatar zańnamalyq aktilerine ózgerister engizý kózdeledi. Naqtyraq aıtqanda, Ákimshilik quqyq buzýshylyq týraly kodeksti naryq sýbektileriniń básekelestikke qarsy kelisimderiniń kez kelgen nysanyna ákep soqtyrýy múmkin nemese ákep soqtyrǵan naryq sýbektileriniń ekonomıkalyq qyzmetin jeke jáne zańdy tulǵalardyń úılestirgeni úshin, sondaı-aq monopolııaǵa qarsy organǵa ekonomıkalyq shoǵyrlaný jasalǵany týraly habarlamany bermegeni úshin jaýaptylyqty belgileýdi kózdeıtin normalarmen tolyqtyrý usynylady.
Sonymen qatar, Qazaqstan Respýblıkasy Qylmystyq Kodeksiniń 196-babyna iri zalal kólemin aıqyndaýǵa baılanysty túzetýler engiziledi. Sonymen qatar «Básekelestik týraly» zańǵa monopolııaǵa qarsy organǵa ekonomıkalyq shoǵyrlanýǵa kelisim alý úshin usynylatyn aqparattan basqa sheteldik zańdy tulǵalar qosymsha usynatyn qujattar tizbesi aıqyndalady. Ústem nemese monopolııalyq jaǵdaıǵa ıe naryq sýbektileriniń básekelestikti shekteýge ákep soqtyryp otyrǵan tyıym salynatyn is-qımyldarynyń tizbesi tolyqtyrylady, naryq sýbektileriniń arasynda jasalǵan kelisimderge (básekelestikke qarsy kelisimderge) tyıym salynatyn jáne olar jaramsyz dep tanylatyn sharttar naqtylanady.
Májilis Senat tarapynan engizilgen usynystarǵa kelisimin berdi.
