Májilis bankrottyqty reformalaýǵa baǵyttalǵan zań jobasy boıynsha Senatpen kelisimge keldi
ASTANA. QazAqparat - Búgin QR Parlamenti Májilisiniń jalpy otyrysynda palata depýtattary «Ońaltý jáne bankrottyq týraly» zań jobasyna Senat engizgen ózgeristerdi qarap, oǵan kelisim berdi.
Eske sala keteıik, zań jobasy ońaltý jáne bankrottyq rásimderin jeńildetýge baǵyttalǵan jáne boryshkerdi bankrot dep taný negizderin belgileıdi. Bul rette bankrottyq júıesin reformalaýǵa baılanysty ózgeristerdiń bir toptamasy tólemge qabiletsizdikti sheshý qaǵıdattaryn ózgertýge negizdeledi. Toqtala ketetin jaıt, qoldanystaǵy bankrottyq tártibi birshama deńgeıde kásiporyndardy taratýǵa baǵyttalǵan jáne qarjylyq saýyqtyrý rásimderin qoldanýdy yntalandyrmaıdy. Al bankrottyq júıeni reformalaý «kóleńkeli ekonomıkaǵa» qarsy is-qımyl jasaý sharalarynyń biri bolyp tabylady. Óıtkeni, búgingi tańda kóptegen josyqsyz boryshkerler bankrottyq rásimin jaýapkershilikten jáne kredıtorlar aldyndaǵy óz mindetterin oryndaýdan jaltarý ádisi retinde paıdalanady. Osyǵan baılanysty, zań jobasynda bankrottyq júıege kózqarastardy ózgertý kózdeledi. Munda eń aldymen syrttaı baqylaýshydan ýaqytsha basqarýshy tulǵany engizýge kóshý qarastyrylady. Óıtkeni, sarapshylardyń aıtýynsha, syrttaı baqylaý rásimi tıimsiz ári boryshkerdiń tólemge qabilettiligin naqty sheshe almaıdy. Sondyqtan da zań jobasymen osy rásim alynyp tastalady. Sonymen qatar, boryshkerdiń jaýapkershiligi kúsheıtiledi. Bul onyń laýazymdy adamdarymen sýbsıdıarlyq jaýapkershilikti belgileý arqyly kúsheıtiledi. Tutastaı alǵanda, zań jobasy qasaqana bankrottyq jaǵdaılardy birshama qysqartady dep kútiledi. Senat Májilis maquldaǵan qujatqa birshama ózgerister engizgen bolatyn. Atap aıtqanda, «jalǵan bankrottyq» uǵymy jańa redaktsııada jazylyp otyr. Budan basqa da birqatar normalar naqtylanady. Mundaı túzetýlerge Májilis depýtattary kelisimderin berip otyr.
