Májilis bankrottyq rásimder týraly zań jobasyn birinshi oqylymda maquldady
NUR-SULTAN. QazAqparat - Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ońaltý jáne bankrottyq rásimderin jetildirý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaıdy QazAqparat tilshisi.
Zań jobasy ońaltý jáne bankrottyq rásimderin qoldaný úshin jaǵdaılardy jeńildetýge, sondaı-aq rásimderdi júrgizý merzimderin qysqartýǵa jáne jumys istemeıtin boryshkerlerdi jeńil túrde taratýǵa baǵyttalǵan.
QR Qarjy birinshi vıtse-mınıstri Berik Sholpanqulov bankrottyq rásim júrgizý merzimderin qysqartý qadamdaryna toqtala kele: «Merzimderdi qysqartý úshin zań jobasynda kredıtorlar jınalysynyń birqatar ókilettikterin neǵurlym tez áreket etetin kredıtorlar komıtetine berý usynylady. Osynyń esebinen bankrottyq rásimin júrgizý merzimin edáýir ońtaılandyrý kútilýde», - dedi.
Onyń sózine qaraǵanda, uzaq ýaqyt boıy jumys istemeıtin boryshkerlerdi bankrottyq rásimin qozǵamaı jeńildetilgen túrde taratý qarastyrylǵan.
«Búginde bankrottyq rásimniń shyǵyndylyǵyna baılanysty ony qoldanbaıtyn talaı áreketsiz kásiporyndar bar. Olardy jabý úshin zań jobasy ákimshini tartpaı, boryshkerlerdi jeńildetilgen túrde taratý rásimin usynady. Bul kásipkerlik qyzmetin is júzinde toqtatqan boryshkerlerdi tez jáne artyq shyǵynsyz taratýǵa múmkindik beredi», - dedi birinshi vıtse-mınıstr.
B. Sholpanqulovtyń sózine qaraǵanda, zań jobasy qazir tek bankrottyqqa bara alatyn jeke kásipkerlerdiń ońaltylýyna múmkindik beredi.
Tájirıbede basqa da problemalar bar. Mysaly, ońaltý josparyn bekitý - kompanııanyń kúndelikti jumysynyń jalǵasýyna kepildik bermeıdi.
«Shottarǵa jáne múlikterge salynǵan shekteýlerdi alý týraly tikeleı norma joq. Zań jobasynda sot ońaltý josparyn bekitken kezden bastap, shottar men múlikterden barlyq shekteýlerdi alý usynylady», - dedi birinshi vıtse-mınıstr.
