Májilis balyq sharýashylyǵy jónindegi joba boıynsha kelisim komıssııasyn qurý týraly sheshim qabyldady
ASTANA. Jeltoqsannyń 9-y. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine balyq sharýashylyǵy máseleleri boıynsha ózgerister men tolyqtyrýlar engizý týraly» zań jobasyna Senat tarapynan engizilgen ózgeristerdi talqylady. Nátıjesinde qos palata arasyndaǵy kelispeýshilikterdi eńserý jónindegi kelisim komıssııasyn qurý týraly sheshim qabyldandy,
dep habarlaıdy QazAqparat.
Esterińizge sala keteıik, atalǵan qujat Elbasynyń joldaýlaryn jáne Úkimettiń 2007-2009 jyldarǵa arnalǵan baǵdarlamasyn iske asyrýdyń jalpyulttyq josparyna sáıkes ázirlengen. Jobanyń negizgi maqsaty balyq resýrstaryn jáne basqa da sý janýarlaryn qorǵaýdy, olardyń ósimin molaıtýdy jáne utymdy paıdalanýdy quqyqtyq jaǵynan qamtamasyz etý bolyp otyr. Osy rette, qujatta balyq sharýashylyǵynyń qarqyndy jáne jan-jaqty damýyn qamtý maqsatynda, sondaı-aq balyqty jasandy túrde ósirýdiń normalaryn retteý men balyqtardyń qyrylýyna qarsy sharalar kózdeledi. Bunymen qosa qujatta eń bastysy, tabıǵı ortadan alynǵan bekire tuqymdas balyqtardy satyp alýǵa jáne olardyń ýyldyryǵyn qaıta óńdeý jáne satýǵa memlekettik monopolııa engizý qarastyrylǵan bolatyn. Bul Elbasynyń tapsyrmasyna sáıkes, Kaspıı qoryqtyq aımaǵynyń ekojúıesin jáne bıologııalyq alýan túrliligin saqtaý qajettiligine baılanysty júzege asyrylady.
Jobany talqylaý barysynda senatorlar janýarlar dúnıesi nysandaryn alyp qoıýǵa arnalǵan kvotany bólý tártibin Úkimettiń quziretine berý týraly túzetý engizgen bolatyn. Budan basqa, Senat usynǵan ózgerister boıynsha balyqtyń bekire tuqymdas túrlerin aýlaýdyń búkil úderisine, ýyldyryǵyn, sondaı-aq basqa da ónimderin óńdeý men ótkizýge memlekettiń aıryqsha monopolııasyn belgileý qarastyrylady.
Májilis depýtattary birqatar túzetýler boıynsha óz ustanymdaryn qorǵap shyǵý úshin kelisim komıssııasyn quryp, onyń quramyna múshelerdi saılady.
