Májilis Balqash JES-i qurylysyn bastaýǵa múmkindik beretin zań jobasyn maquldady
ASTANA. 18 qyrkúıek. QazAqparat - Búgin Parlament Májilisiniń jalpy otyrysynda palata depýtattary «2011 jylǵy 25 tamyzdaǵy Qazaqstan Respýblıkasynyń Úkimeti men Koreıa Respýblıkasynyń Úkimeti arasyndaǵy Balqash Jylý elektr stansasyn damytý, qarjylandyrý, jobalaý, salý, paıdalaný jáne oǵan tehnıkalyq qyzmet kórsetý salasyndaǵy kelisimge ózgerister engizý týraly» Qazaqstan men Koreıa Respýblıkasynyń Úkimetteri arasyndaǵy Hattamany ratıfıkatsııalaý týraly» zań jobasy maquldady.
Indýstrııa jáne jańa tehnologııalar mınıstri Áset Isekeshevtiń aıtýynsha, Balqash elektr stansasyna qatysty kelisimge Qazaqstan men Koreıa eki jyl buryn qol qoıǵan bolatyn. Soǵan sáıkes, aktsıoner retinde qazaqstandyq taraptan «Samuryq-Energo» AQ, al koreı tarapynan «Koreıa Elektrık Paýer Korporeıshn» men «Samsýng Korporeıshn» kirip otyr. Jobalyq kompanııalar Qazaqstan zańnamasyna sáıkes jeńildikter alýǵa quqyǵy bar. Jalpy osy kelisim aǵymdaǵy jyldyń sáýirinde Parlamentpen qabyldanǵan bolatyn.
«Hattamamen kelisimniń 2 babyna ózgeris engiziledi, ol boıynsha Úkimet jalpy tarıfti, qarjylandyrý aýqymyn, stansanyń júzege asyrylý merzimin anyqtaıtyn bolady. Koreıa Respýblıkasy bul hattamaǵa qol qoıǵan. Qujatty qabyldaý Balqash stansasyn salý qurylysyn bastaýǵa múmkindik beredi», - deıdi Á. Isekeshev.
Sondaı-aq, Kelisimde qoldanylatyn termınderdi elektr energetıkasy, tabıǵı monopolııalar men retteletin naryq sýbektileriniń ınvestıtsııalyq qyzmeti máseleleri boıynsha sáıkestendirý úshin de ózgerister engiziledi.
Májilis maquldaǵan zań jobasy Senatqa joldanady.
