Májilis balanyń quqyqtaryn qorǵaýdy qamtamasyz etý jónindegi jobany birinshi oqylymda maquldady
ASTANA. Naýryzdyń 3-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine balanyń quqyqtaryn qorǵaýdy qamtamasyz etý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda tujyrymdamaly túrde maquldady,
dep habarlaıdy QazAqparat.
«Zań jobasynyń maqsaty kámeletke tolmaǵandardyń quqyqtaryn, bostandyqtaryn, múddelerin qorǵaý deńgeıin arttyrý bolyp tabylady. Sonymen birge, balanyń quqyqtaryn qorǵaý men kámeletke tolmaǵandar arasynda quqyq buzýshylyqtardyń aldyn alýǵa baǵyttalǵan quqyqtyq sharalar júıesin keńeıtý kózdeledi. Osyǵan oraı, zań jobasynda urlyq, tonaý jáne bopsalaýshylyq jasaǵany úshin qylmystyq jaýapkershilik bastalatyn jasty 14-ten 16-ǵa deıin ulǵaıtý kózdeledi. Kámelettik jasqa tolmaǵan balany jezókshelikpen aınalysýǵa tartqany úshin jaýaptylyq kózdelgen bap engiziledi. Budan bólek kámeletke tolmaǵan balanyń erotıkalyq sıpattaǵy materıaldardy satýyna tıym salynady», dedi zań jobasy boıynsha baıandama jasaǵan QR Іshki ister mınıstriniń orynbasary Amantaı Áýbákirov.
Onyń aıtýynsha, qujatta sondaı-aq kámeletke tolmaǵandardy olardyń densaýlyǵyna zııan tıgizetin aýyr jumystarǵa nemese olardyń bilim alýyna kedergi keltiretin jumystarǵa tartýǵa tıym salynady. Zań jobasy boıynsha damyǵan elderdiń balalar quqy boıynsha tájirıbeleri zerdelenip, eskerilgen.
Birinshi oqylymda maquldanǵan zań jobasy ekinshi oqylymǵa ázirleý úshin Bas komıtetke tapsyrylady.
