Májilis balalardy zııandy aqparattardan qorǵaýǵa baǵyttalǵan zań jobasyn maquldady
ASTANA. QazAqparat - Búgin Májilis spıkeri Nurlan Nyǵmatýlınniń tóraǵalyǵymen ótken jalpy otyrysta depýtattar bastamashy bolǵan, el múddesin qorǵaýǵa arnalǵan birqatar zań jobalary maquldandy, dep habarlaıdy QazAqparat.
Olardyń qatarynda Bilim (birinshi oqylym) jáne táýekeldik (venchýrlik) qarjylandyrý, gaz jáne gazben jabdyqtaý týraly, balalardyń densaýlyǵy men damýyna zardabyn tıgizetin aqparattan qorǵaý máselelerine túzetýlerge qatysty zań jobalary (ekinshi oqylym) depýtattar qoldaýyna ıe boldy.
«Búgin tikeleı depýtattarymyzdyń ózderi bastamashy bolǵan tórt zań jobasyn maquldadyq. Osy qujattar kóptegen áleýmettik máselelerdi sheshýge baǵyttalyp otyr. Bul depýtattyq korpýs úshin úlken nátıje ekeni sózsiz», - dedi Májilis tóraǵasy. Ol zań jobalaryna qatysqan barlyq áriptesterine jáne jumys tobynyń múshelerine alǵysyn bildirdi.
Zań jobalary Senat qaraýyna joldandy.
