Májilis balalardy olardyń damýyna zardabyn tıgizetin aqparattan qorǵaýǵa baǵyttalǵan zań jobasyn maquldady
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine balalardy densaýlyǵy men damýyna zardabyn tıgizetin aqparattan qorǵaý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy.
Atalǵan qujat buǵan deıin maquldanǵan «Balalardy densaýlyǵy men damýyna zııan tıgizetin aqparattan qorǵaý týraly» zań jobasynyń normalaryna oraı daıyndalǵan. Zań jobasyna Májilistiń birqatar depýtattary bastamashylyq jasap otyr.
«Áýelgide qujat boıynsha Ákimshilik quqyq buzýshylyq týraly kodekske, «QR-da balanyń quqyqtary týraly», «Jarnama týraly», «Teleradıohabarlaryn taratý týraly» jáne «BAQ týraly» zańdarǵa ózgerister engizý qamtylǵan bolatyn. Máseleni zertteı kele, negizgi zań jobasynyń mazmuny aıqyndaldy. Soǵan oraı, ózgerister engiziletin zańdardyń qatary tolyǵa tústi. Atap aıtqanda, «Ruqsattamalar men habarlandyrýlar týraly», «Derbes derekter týraly», «QR memlekettik baqylaý jáne qadaǵalaý týraly», «Bilim jáne ǵylym týraly» birqatar zańdarǵa ózgerister men tolyqtyrýlar engizip otyrmyz», - dedi zań jobasy bastamashynyń biri depýtat Aldan Smaıyl.
Onyń aıtýynsha, ózgerister negizinen aqparattyq qaýipsizdikten bastap, radıoelektrondyq nemese joǵary jıilikti qurylǵylardy paıdalaný qaǵıdalarynyń saqtalýy, bilim berý mekemelerinde balalardy zııandy aqparattan qorǵaýdy qamtamasyz etetin aqparattyq baǵdarlamalyq keshenniń bolýy sekildi normalar qamtylyp otyr.
«Budan bólek, jarnamany balalar densaýlyǵy men damýyna zııanyn tıgizetin aqparattyq ónimdi nasıhattaý úshin paıdalanbaý, ınternet resýrstaryna talap qoıý, balalardyń aqparattyq qaýipsizdigi baǵytyndaǵy memlekettik saıasat pen ony iske asyrý sekildi ózekti sharalar qamtylǵan», - dedi depýtat.
Ekinshi oqylymda maquldanǵan zań jobasy Senatqa joldanady.
