Májilis balalardy halyqaralyq urlaýdyń azamattyq-quqyqtyq aspektileri týraly konventsııany maquldady
ASTANA. 3 qazan. QazAqparat - Búgin QR Parlamenti Májilisiniń jalpy otyrysynda palata depýtattary «Balalardy halyqaralyq urlaýdyń azamattyq-quqyqtyq aspektileri týraly konventsııany ratıfıkatsııalaý týraly» zań jobasyn maquldady.
Qujat Parlament Senatyna joldanatyn bolady.
Atalǵan Konventsııa 1980 jylǵy 25 qazanda Gaagada jasalǵan. Konventsııa ýaǵdalasýshy memleketterdiń kez kelgenine zańsyz alyp ótilgen, zańsyz ustalyp otyrǵan balalardyń dereý qaıtarylýyn qamtamasyz etý maqsatynda jasalǵan bolatyn. Sondaı-aq qujat ýaǵdalasýshy memleketterdiń bireýiniń zańnamasynda kózdelgen qorǵanshylyqqa jáne qol jetkizýge quqyqtardyń basqa ýaǵdalasýshy memleketter aýmaǵynda saqtalýyn da qarastyrady.
«Konventsııaǵa qosyla otyryp, Qazaqstan zańsyz alyp ótilgen balalardyń dereý qaıtarylýyna mindetti sanalady. Qujatty qabyldaý arqyly elimiz osy Konventsııaǵa qatysýshy memlekettermen yntymaqtastyqty nyǵaıta túsedi, zańsyz alyp ótilgen jaǵdaıda qazaqstandyq balalardy halyqaralyq aýqymda qorǵaýdy qamtamasyz etedi. Budan bólek, olardyń turaqty turatyn memleketine qaıtarylýyna qatysty biregeı úderisterdi moıyndaıdy», - dedi zań jobasy boıynsha baıandaǵan Іshki ister mınıstri Qalmuhanbet Qasymov. Onyń aıtýynsha, atalǵan Konventsııa Ýaǵdalasýshy memlekette turaqty turǵan kez kelgen balaǵa qatysty qoldanylatyn bolady. Budan bólek, Konventsııaǵa sáıkes, bala 16 jasqa tolǵanda onyń qoldanylýy toqtatylady.
Qujatta Ortalyq organnyń fýnktsııalary, balalardy qaıtarý, qol jetkizý quqyǵyn júzege asyrýdy uıymdastyrý nemese qamtamasyz etý tártibi belgilenedi. Konventsııaǵa búgingi tańda 80-nen astam el qosylǵan.
