Májilis baǵaly metaldar men asyl tastar týraly zań jobasyn talqylaıdy
ASTANA. QazAqparat - Búgin Parlament Májilisiniń Tóraǵasy Qabıbolla Jaqypovtyń tóraǵalyǵymen Májilis Bıýrosy ótip, onda aldaǵy aptada ótetin jalpy otyrystyń kún tártibi naqtylandy. Bul týraly palatanyń baspasóz qyzmetinen habarlady.
Bıýro bekitken kún tártibine sáıkes, palata depýtattary aldaǵy otyrysta «Baǵaly metaldar men asyl tastar týraly» zań jobasyn ilespe qujatymen birge birinshi oqylymda talqylaıtyn bolady. Atalǵan zań jobasy baǵaly metaldar men asyl tastardyń óndirisi jáne aınalymy salasynda týyndaıtyn qoǵamdyq qatynastardy retteýdiń jáne baqylaýdyń biryńǵaı zańnamalyq negizin qalyptastyrý kózdeıdi. Osy saladaǵy ulttyq zańnama úılestirilip, zergerlik ónerkásipti damytý úshin jaǵdaı jasalatyn bolady.
«Sonymen qatar jalpy otyrysta halyq qalaýlylarynyń talqysyna sporttyq-buqaralyq, mádenı oıyn-saýyq jáne basqa da is-sharalar ótkizý kezinde qaýipsizdikti qamtamasyz etý máselelerine arnalǵan zań jobasy da usynylady. Bul zań jobasynyń negizgi maqsaty sporttyq-buqaralyq, mádenı oıyn-saýyq jáne basqa da is-sharalardyń uıymdastyrylýy men ótkizilýine qatysty quqyqtyq qarym-qatynastardy retteý, sondaı-aq qoǵamdyq qaýipsizdiktiń buzylýynyń aldyn alý bolyp otyr», delingen baspasóz baıanynda.
