Májilis azaptaýlardyń, ar-namysty qorlaıtyn is-áreketter men jazalaýdyń ulttyq aldyn alý tetigin qamtyǵan jobany maquldady
ASTANA. 5 jeltoqsan. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıibir zańnamalyq aktilerine azaptaýlardyń jáne basqa da qatygez,
adamgershilikke jatpaıtyn nemese ar-namysty qorlaıtyn is-áreketter men jazalaý túrleriniń aldyn alýǵa baǵyttalǵan ulttyq aldyn alý tetigin jasaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Atalǵan qujat Azaptaýlarǵa jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrlerine qarsy konventsııany iske asyrý maqsatynda ázirlengen.
Bul rette zań jobasynyń maqsaty túzeý mekemeleri men tergeý ızolıatorlarynda, alkogolızmge, nashaqorlyq pen ýytqumarlyq dertine shaldyqqan aýrýlardy emdeýdi júzege asyratyn mekemelerde Adam quqyqtary jónindegi ýákildiń, qoǵamdyq baıqaýshy komıssııalar men qoǵamdyq birlestikterdiń únemi bolý júıesin ulttyq aldyn aly tetigi retinde bekitýdi kózdeıdi. Sondaı-aq, atalǵan tulǵalar men uıym ókilderi qoǵamnan ýaqytsha oqshaýlaýdy qamtamasyz etetin arnaýly mekemelerde, kámeletke tolmaǵandardy beıimdeý ortalyqtarynda, arnaýly jáne erekshe rejımdegi bilim berý uıymdarynda únemi bola alatyny qarastyrylady.
Osyǵan oraı, zań jobasymen QR Qylmystyq kodeksine, Ákimshilik quqyq buzý týraly kodeksine jáne birqatar zańnamalarǵa ózgerister engizý usynylady. Birinshi oqylymda maquldanǵan zań jobasy ekinshi oqylymǵa ázirleý úshin Bas komıtetke tapsyryldy.
