Májilis azamattyq zańnamany jetildirýge baǵyttalǵan zań jobasyn qabyldady
ANA. 9 aqpan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary
«QR keıbir zańnamalyq aktilerine azamattyq zańnamany jetildirý máseleleri boıynsha ózgerister men tolyqtyrýlar engizý týraly» zań jobasy boıynsha kelisim komıssııasynyń usynystaryn talqylap, qujatty qabyldady.
Esterińizge sala keteıik, qos palata arasynda negizgi 3 pozıtsııa boıynsha kelispeýshilikter týyndap, ony eńserý úshin kelisim komıssııasy qurylǵan bolatyn.
Atalǵan qujat ekonomıkany damytýdyń mańyzdy sharty retinde azamattyq zańnamanyń turaqtylyǵyn saqtaý kezinde Azamattyq kodekstiń ınstıtýttary men normalaryn jetildirýge baǵyttalady. Sonymen birge jekemenshik ınstıtýttarmen kelisimsharttyq qatynastardy barynsha nyǵaıtýdy kózdeıdi. Máselen, osyndaı ınstıtýttarmen kelisimsharttyq qatynastardy nyǵaıtý maqsatynda qujat boıynsha mámile jaramsyzdyǵyna, kepildik jarna ınstıtýtyn engizýge, kólik quralyn ekıpajsyz jaldaý shartyna qatysty birshama ózgerister engiziledi. Budan bólek zań jobasymen jyljymaıtyn múlikke quqyqtardy tirkeý salasyndaǵy quqyqtyq olqylyqtardy joıýǵa baǵyttalǵan normalar qamtylyp otyr. Zańdy tulǵanyń jeke múliktik emes quqyqtardy buzǵany úshin moraldyq zııandy óndirip alý múmkindigin boldyrmaýǵa baǵyttalǵan túzetýler de engizilgen. Jalpy alǵanda jobaǵa sáıkes qoldanystaǵy 26 zań aktilerine ózgerister men túzetýler engiziledi.
Kelisim komıssııasy 3 pozıtsııany talqylap, onyń 2-eýin birlesken redaktsııada, 1-eýin Senat redaktsııasynda qabyldaǵan bolatyn.
