Májilis azamattyq zańnamany jetildirýge baǵyttalǵan qujatpen jumysty jalǵastyrady
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktileri azamattyq zańnamany jetildirý máseleleri boıynsha ózgerister men tolyqtyrýlar engizý týraly» zań jobasymen jumysty jalǵastyrý týraly qaýly qabyldady.
Aıta keterligi, atalǵan zań jobasy Úkimetten Májiliske byltyrǵy 2015 jyldyń shildesinde kelip túsken bolatyn. Qazir qujat palatanyń Zańnama jáne quqyqtyq reforma komıtetiniń qorjynynda jatyr.
«Zań jobasyna qorytyndy ázirleý merzimi 2016 jyldyń 27 mamyryna belgilengen bolatyn. Negizinen qujat azamattyq zańnamany jetildirýge baǵyttalady. Sonyń ishinde jeke quqyqty, ómir boıǵy quqyqtardy qalpyna keltirý, olardyń týyndaýyna quqyqtyq negizderin jetildirý, moıyndaý (taný) ınstıtýtyn jetildirý máseleleri qamtylyp otyr», - deıdi zań jobasyna qatysty túsinik bergen depýtat Nurlan Ábdirov.
Onyń aıtýyna qaraǵanda, zań jobasyn jumys toptarynda talqylaý barysynda 78 túzetý kelip túsken.
«Sonymen birge, zań jobasymen qoldanystaǵy eki kodeks pen 9 zańǵa ózgerister engizý qajettiligi týyndap otyr. Bunyń ózi qujatty eki oqylymda talqylaýǵa ákep soqtyrady. Budan basqa, depýtattar tarapynan kelip túsken usynystar jumys tobynda muqııat talqylaýdy talap etedi. Oǵan barlyq múddeli taraptardy qatystyrýǵa tıispiz. Sonymen qosa jańa shaqyrylym depýtattarynyń tarapynan da usynystar túsýi múmkin» - dedi depýtat N. Ábdirov. Osyǵan oraı, Májilis depýtattary atalǵan zań jobasymen jumysty odan ári jalǵastyryp, qujat boıynsha qorytyndy ázirleý merzimin 2017 jyldyń 20 naýryzyna deıin uzartýdy qoldady.
