Májilis áıelder men erkekterdiń teń quqyqtaryn qamtýǵa arnalǵan jobany maquldady
A. Qarashanyń 17-si. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda palata depýtattary «Áıelder men erkekterdiń teń quqyqtary men birdeı múmkindikteri týraly» QR zań jobasyn maquldady,
dep habarlaıdy QazAqparat.
Qazaqstan álemdik qoǵamdastyqqa barynsha yqpaldasyp, kirigýdi syrtqy saıasat salasyndaǵy basymdyq retinde belgilegeni málim. Sonymen birge, 2000 jylǵy Myńjyldyq sammıtinde álemniń kóptegen elderiniń kóshbasshylary BUU myńjyldyq deklaratsııasyn qabyldaǵan bolatyn. Onda áıelder men erkekterdiń teńdigine qoldaý kórsetý, áıelderdiń quqyqtary men múmkindikterin keńeıtý úshinshi myńjyldyqtaǵy adamzat damýynyń negizgi maqsattary retinde aıqyndalǵan. Óz kezeginde Qazaqstan áıelder men erkekterdiń quqyqtary men zańdy múddelerin qorǵaý salasynda belgili bir jetistikterge jetti. Máselen, 1998 jyly Qazaqstan BUU-nyń áıelderge qatysty kemsitýshiliktiń barlyq túrlerin joıý týraly Konventsııasyna qosyldy. Budan basqa, BUU-nyń «Áıelderdiń saıası quqyqtary týraly» jáne «Turmystaǵy áıelderdiń azamattyǵy týraly» konventsııalaryn, azamattyq jáne saıası, ekonomıkalyq, áleýmettik jáne mádenı quqyqtar týraly basqa da halyqaralyq paktilerdi qabyldady. Qazaqstan sondaı-aq adam quqyqtary jónindegi barlyǵy 60-tan astam halyqaralyq sharttarǵa qosylǵan. Alaıda, elimizde memlekettik jáne qoǵamdyq ómirdiń barlyq salalaryndaǵy genderlik teńdik pen áriptestik yntymaqtastyqqa jaǵdaı jasaıtyn normatıvtik quqyqtyq akti bolmaı otyr. Osyǵan baılanysty atalǵan zań jobasyn ázirleý qajettigi týyndap, oǵan birqatar depýtattar bastamashylyq jasaǵan bolatyn.
«Qujatty qabyldaýdaǵy basty maqsat - Ata zańymyzda bekitilgen jynysyna qaraı kemsitýshilikke jol bermeı, áıelder men erkekterdiń teń quqyqtary men birdeı múmkindikterin júzege asyrý úshin jaǵdaılar qalyptastyrý. Osy baǵytta qujatta adamdardyń jynysyna qaramastan áleýmettik-eńbek qatynastary men bilim jáne ǵylym salasynda, memlekettik jáne qoǵamdyq ómirdegi basqa da salalarda olardyń teńdigine kepildik bolatyn sharalar qamtylyp otyr», dedi depýtat Elena Tarasenko.
