Májilis avtorlyq quqyq salasyna qatysty qujatty qabyldady

ASTANA. QazAqparat – Búgin Májilistiń jalpy otyrysynda «TMD-ǵa qatysýshy memleketterdiń aqparattyq-telekommýnıkatsııalyq jelilerde avtorlyq quqyq pen sabaqtas quqyqtar obektilerine quqyqtardy saqtaý jáne qorǵaý boıynsha yntymaqtastyǵy týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Kelisimge 2021 jylǵy 12 qarashada TMD Úkimet basshylarynyń otyrysynda TMD-nyń segiz memleketi qol qoıdy. Qujat avtorlyq quqyq jáne sabaqtas quqyqtar obektilerin Dostastyqqa qatysýshy memleketterdiń aýmaǵynda tsıfrlyq ortada, onyń ishinde Internette paıdalaný máselelerin retteýge baǵyttalǵan.

«Kelisim aqparattyq-telekommýnıkatsııalyq jelilerde, onyń ishinde ınternette avtorlyq quqyq obektilerine jáne sabaqtas quqyqtarǵa qatysty quqyqtardyń buzylýyna qarsy is-qımyl tetikterin qurý jónindegi sharalardy ázirlep, iske asyrý baǵytynda júzege asyrylady. Kelisimniń maqsaty - zańnamany jetildirý, osy salada zań buzýǵa jol bermeý jónindegi is-sharalardy ázirleý, sondaı-aq aqparatpen, ǵylymı zertteýlerdiń nátıjelerimen almasý», - dedi QR Ádilet mınıstri Azamat Esqaraev.

Onyń aıtýynsha, TMD-ǵa múshe memleketterdiń ýákiletti organdary arasynda semınarlar men konferentsııalar ótkizý arqyly osy saladaǵy yntymaqtastyqty odan ári tereńdetý jospary eskerilgen. Bul kelisim tsıfrlyq ortada avtorlyq quqyqty jáne sabaqtas quqyqtardy saqtaý ári qorǵaý salasyndaǵy halyqaralyq normatıvtik-quqyqtyq bazany damytý aıasynda bekitildi.

«Máselen, 2020 jyly Qazaqstan Respýblıkasynda lıtsenzııalanbaǵan 24 sheteldik ınternet-resýrs anyqtaldy. 2021 jyly osyndaı 40 ınternet-resýrs belgili boldy. Olar týraly aqparat buǵattaý týraly máseleni qaraý úshin «Kıbernadzor» aqparattyq júıesine engizildi. Kelisim tsıfrlyq ortada zııatkerlik quqyqtardy saqtaý jáne qorǵaý salasynda bolatyn problemalardy sheshýdiń jalpy tásilderin belgileýge múmkindik beredi. Kelisim aıasynda qamtylǵan taraptardyń ózara is-qımylyn úılestirý TMD aıasynda Zııatkerlik menshikti quqyqtyq saqtaý jáne qorǵaý máseleleri jónindegi memleketaralyq keńeske júktelgen. Taraptar yntymaqtastyqty ózderiniń ýákiletti organdary arqyly júzege asyratyn bolady. Osy oraıda Qazaqstan Respýblıkasynda Ádilet mınıstrligi, Tsıfrlyq damý, ınnovatsııalar jáne aeroǵarysh ónerkásibi mınıstrligi, Aqparat jáne qoǵamdyq damý mınıstrligi, Іshki ister mınıstrligi, Joǵarǵy sot eskerilgen», - dedi mınıstr.

QAtalǵan qujat boıynsha qazirgi kezde memleketishilik rásimderdi Armenııa Respýblıkasy, Belarýs Respýblıkasy, Qyrǵyz Respýblıkasy, Reseı Federatsııasy jáne Ózbekstan Respýblıkasy ótkizdi.