Májilis aýyldarda ınternet sapasyn jaqsartýǵa arnalǵan qujatty maquldady

NUR-SULTAN. QazAqparat – Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine aýyldyq eldi mekenderde ınternettiń qoljetimdiligin qamtamasyz etý máseleleri boıynsha ózgerister men tolyqtyrýlar engizý týraly» zań jobsy ekinshi oqylymda maquldandy, dep habarlaıdy QazAqparat tilshisi.

Zań jobasy aýyldyq eldi mekenderdi ınternetke keńjolaqty qoljetimdilikpen qamtamasyz etý maqsatynda ázirlendi. Osy zań jobasy 2020 jylǵy 3 maýsymda birinshi oqylymda maquldandy.

Jumys toby aıasynda zań jobasymen jumys isteý barysynda depýtattar túzetýler engizdi.

Bul túzetýler: jalpyǵa ortaq paıdalanylatyn avtomobıl joldarynyń boıynan bólingen beldeý sheginde uıaly nemese spýtnık baılanysy jabdyǵyna arnalǵan antenna-dińgekti qurylystar men tireýishter salý jónindegi normalardy naqtylaýǵa; uıaly nemese spýtnıktik baılanys operatorynyń ótinishi boıynsha jergilikti atqarýshy organdardyń uıaly nemese spýtnıktik baılanys jabdyǵyna arnalǵan antenna-dińgekti qurylystar men tireýishter salý úshin elektrmen jabdyqtaý júrgizilgen jerdi berýi jónindegi normalardy naqtylaýǵa baǵyttalǵan.

Depýtattar Qazaqstan Respýblıkasynyń qoldanystaǵy zańnamasyna jáne zań tehnıkasynyń talaptaryna sáıkes keltirý boıynsha, sondaı-aq zań jobasynyń jekelegen normalaryn naqtylaıtyn jáne mazmunyn jaqsartatyn túzetýler engizdi.

Jumys tobyna turaqty komıtetter men Májilis depýtattarynan 30 usynys kelip túsip, olar múddeli mınıstrlikter, vedomstvolar, baılanys operatorlary jáne qoǵamdyq uıymdar ókilderiniń qatysýymen jumys tobynyń otyrystarynda, Komıtettiń keńeıtilgen otyrystarynda talqylandy.