Májilis aýyl sharýashylyǵy jerlerin jeke menshikke berýdiń jańa tetigin engizetin zań jobasyn maquldady
ASTANA. QazAqparat - Búgin Parlament Májilisiniń jalpy otyrysynda palata depýtattary «QR Jer kodeksine ózgerister men tolyqtyrýlar engizý týraly» zań jobasyn birinshi oqylymda maquldady.
Atalǵan zań jobasy Elbasynyń bes ınstıtýtsıonaldyq reformasy aıasyndaǵy «100 naqty qadam» Ult josparyn júzege asyrýǵa baǵyttalady. Bul rette qujattyń basty maqsaty aǵylshyndyq ádispen aýktsıondar (keminde eki aýktsıon) ótkizý arqyly aýyl sharýashylyǵy maqsatyndaǵy jerlerdi jeke menshikke berýdiń jańa tetigin engizý bolyp tabylady. Qujatqa sáıkes, aǵylshyn ádisimen ótetin aýktsıondardy iske asyrý múmkin bolmaǵan jaǵdaıda jer ýchaskesin satý gollandyq ádispen ótkiziletin bolady. Ol boıynsha jer ýchaskesin satý onyń kadastrlyq qunynyń elý paıyzy mólsherinen tómen baǵamen satýǵa jol berilmeıdi.
Budan bólek, búgingi kúni jerdi paıdalanýshylar jaldaý merzimi aıaqtalǵanǵa deıin jerge ıelik etýdi de jalǵastyra alady. Sonymen qatar, olarǵa ýaqytsha jer paıdalaný merzimi aıaqtalǵanǵa deıin jerdiń qunyn elý paıyzdyq mólshermen jeńildetilgen túrde satyp alý quqyǵy da qarastyrylady. Sondaı aq olarǵa jeńildikti baǵamen tóleý merzimin on jylǵa deıin uzartyp satyp alý quqyǵy beriledi. Al eger jerdiń ýaqytsha ıeleri kórsetilgen quqyqty paıdalanbaıtyn bolsa, onda jer paıdalaný quqyǵy tolyq toqtatylady jáne keıinnen jerdi aýktsıonǵa satý úshin memleket menshigine qaıtarylady.
«Sonymen qatar, jaldanyp jatqan aýyl sharýashylyǵy jerlerin paıdalaný boıynsha shekteýler de alyp tastalady. Bul norma jer paıdalanýshylarǵa jalǵa alý quqyǵymen quqyqtyq mámileler jasaýǵa, onyń ishinde bankke kepilge berýge, ıelikten shyǵarýǵa jáne jaldaý merzimi ishinde sýbarendaǵa tabystaýǵa múmkindikter beretin bolady», - dedi zań jobasy boıynsha baıandaǵan Ulttyq ekonomıka mınıstri Erbolat Dosaev.
Onyń aıtýynsha, bul qadam jerdi paıdalaný quqyǵynyń qundylyǵyn, onyń kepildilik tartymdylyǵyn arttyrady. «Jalpy bul norma aýyl sharýashylyǵy óndirýshileri úshin memleket qoldaýynyń pármendi sharasy bolyp tabylady», - dedi mınıstr.
