Májilis Aýǵanstandy turaqtandyrýdy qoldaýǵa baǵyttalǵan kelisimdi maquldady
ASTANA. 13 sáýir. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń Úkimeti men Amerıka Qurama Shtattarynyń Úkimeti arasyndaǵy Aýǵanstan Islam Respýblıkasynyń qaýipsizdigin,
turaqtylyǵyn jáne ony qaıta qalpyna keltirýdi qamtamasyz etý jónindegi is-qımylǵa AQSh-tyń qatysýyna baılanysty Qazaqstan Respýblıkasynyń aýmaǵy arqyly ótetin júk pen personaldyń áýe tranzıti týraly kelisimdi ratıfıkatsııalaý týraly» zań jobasyn maquldady.
Qazaqstan Prezıdenti N. Nazarbaev pen AQSh prezıdenti B. Obamanyń ýaǵdalastyǵyna sáıkes, AQSh júgin jáne personalyn Aýǵanstanǵa áýe arqyly tranzıtteý týraly ekijaqty kelisimge 2010 jyly 12 qarashada Vashıngtonda qol qoıylǵan. «Jalpy, osy kezge deıin AQSh áýe tranzıti 2001 jylǵy jáne 2002 jyldyń 10 shildesindegi eki el úkimetteri arasyndaǵy ózara túsinistik týraly memorandým sheńberinde júzege asyp kelgen edi. Sonyń nátıjesinde búginge deıin 10 myńǵa jýyq tranzıttik reıs iske asty. Al kelisim kúshine engen kúnnen bastap atalǵan memorandýmdar óz kúshin joıatyn bolady. Aıta keterligi memorandýmdarmen salystyrǵanda kelisim júk tranzıtin jáne mamandardy áýe arqyly tasymaldaýdy júzege asyrýǵa ruqsat berý, múmkin bolatyn zalaldy óteý, kedendik tekserý men shekaralyq baqylaý, sondaı-aq daýlardy sheshý máselelerin retteıdi», - deıdi Syrtqy ister mınıstriniń orynbasary Qaırat Omarov.
Onyń aıtýynsha, kelisim Aýǵanstandy turaqtandyrýdy qoldaýǵa baǵyttalǵan ári Ortalyq Azııa qaýipsizdigine oń áserin tıgizetin bolady. «Elbasy osy kelisimge saıası mán beredi. Sebebi ol aýǵan máselesin sheshýdegi Qazaqstannyń súbeli úlesi bolmaq. Bul Prezıdent N. Nazarbaevtyń elimizdiń tóńireginde qaýipsizdik aımaǵyn qurý jónindegi asa mańyzdy syrtqy saıası maqsatyna da saı keledi», - deıdi Q. Omarov.
