Májilis áýe keńistigin paıdalaný týraly zań jobasyn ekinshi oqylymda maquldady
bsp; Mamyrdyń 5-i. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» zań jobasyn ekinshi oqylymda maquldady,
dep habarlaıdy QazAqparat.
Zań jobasynyń negizgi maqsaty avıatsııa qyzmetin jetildirý, áýe keńistigin paıdalaný salasyndaǵy retteý jáne baqylaý boıynsha memlekettik organdardyń arajigin ajyratý bolyp tabylady. Sonymen birge, qujatta ushý qaýipsizdigin memlekettik baqylaý sharalaryn kúsheıtý, avıatsııalyq tasymaldaý kezinde halyqqa qyzmet kórsetý sapasyn jaqsartý jáne avıatasymaldaýshynyń jaýapkershiligin arttyrý sharalary qarastyrylady. Azamattyq avıatsııanyń áýe kemelerindegi quqyq buzýshylyqtardyń aldyn alý boıynsha tıimdi júıe qurý kózdeledi.
Zań jobasynda azamattyq avıatsııa qyzmetin retteý boıynsha birqatar jańa normalar engizilgen. Bul rette Qazaqstan aýmaǵynda Halyqaralyq azamattyq avıatsııa uıymynyń eýropalyq avıatsııa talaptary sekildi avıatsııalyq standarttary barlyq sýbektiler úshin mindetti túrde qoldanylatyn bolady. Jańa normalarǵa sáıkes, jolaýshylardy, júkterdi kommertsııalyq tasymaldaýdy júzege asyratyn zańdy tulǵalar ǵana áýe kompanııalary bola alady. Áýe kompanııalary kemeleriniń qaýipsiz paıdalanýyn jáne olardyń ushýǵa jaramdylyǵyn saqtaý úshin tıisti qarjylyq resýrstarǵa jáne múlikke ıe bolýǵa tıis. Bul rette turaqty ushýdy júzege asyratyn áýe kompanııalarynda rezervtik ushaq parki jáne tasymaldaýdan túsetin kiristerdi esepke almaǵanda, ushý shyǵyndaryn keminde bir aıda jabý úshin qarjylyq rezervi bolýy shart.
Májilis maquldaǵan qujat Parlament Senatyna jiberiledi.
