Májilis «Atom energııasyn paıdalaný týraly» zań jobasyn maquldady
Atalǵan zań jobasy ıadrolyq, radıatsııalyq jáne elektrofızıkalyq qondyrǵylardy ornalastyrý, salý, paıdalaný jáne paıdalanýdan shyǵarý kezinde qaýipsizdiktiń qaǵıdattary men negizgi talaptaryn belgileýge baǵyttalǵan.
Budan bólek, qujatty qabyldaý atom energııasyn paıdalaný kezinde qaýipsizdikti qamtý jáne ony retteýdegi atom energııasyn paıdalanatyn mekemelerge qaýipsizdik deńgeıiniń talaptaryn oryndaýǵa, olardy júzege asyrýǵa ketetin shyǵyndardy azaıtýǵa múmkindik beredi.
«Sonymen qatar, zań jobasy qorshaǵan ortany qorǵaýdy kózdeıdi, ıaǵnı, memlekettik organdar men uıymdardyń jaýapkershilik ýákilettiligin naqtylaý arqyly qorshaǵan ortany qorǵaýdyń tıimdi joldary anyqtalady»,-dedi zań jobasy boıynsha baıandaǵan Energetıka mınıstri Vladımır Shkolnık.
Onyń aıtýyna qaraǵanda, qoldanystaǵy «Atom energııasyn paıdalaný týraly» zań budan 15 jyl buryn, sol kezeńdegi elimizdiń atomdyq tájirıbeleri, ıadrolyq tehnologııalardy qoldaný deńgeıi men atom ónerkásibi jaǵdaılary esepke alyna otyryp, qabyldanǵan bolatyn.
«Qazirgi ýaqytta Qazaqstanda medıtsınada, ónerkásip pen ǵylymda qoldanylatyn 5 ıadrolyq qondyrǵy, 4 radıoaktıvtik qaldyqtar qoımalary, júzdegen radıatsııalyq qondyrǵylar, birneshe myń sáýleler ıondaıtyn oryndar bar. Qazaqstanda atom energııasyn paıdalaný jumystaryn júrgizýge 3 myńnan astam lıtsenzııalar berilgen. Atom energııasyn paıdalaný salasynda qyzmetterin júzege asyratyn uıymdar men kásipkerlik sýbektiler sany da artyp keledi. Sonymen qatar, Qazaqstan osy ýaqyt aralyǵynda atom energııasyn paıdalaný salasyndaǵy birqatar halyqaralyq konventsııalarǵa da qosylyp otyr», - deıdi V. Shkolnık.
Onyń aıtýynsha, jańa redaktsııadaǵy zań jobasyn ázirleý de osyǵan baılanysty týyndaǵan. Al bul qujatty qabyldaý memlekettik bıýdjetten qosymsha qarajatty arttyrmaıdy ári teris áleýmettik-ekonomıkalyq saldarǵa soqtyrmaıdy.
