Májilis atqarýshylyq qujattardy oryndaý qyzmetin Ádilet mınıstrligine berý týraly jobany maquldady
ASTANA. 17 qarasha. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine atqarýshylyq qujattardy oryndaý, respýblıkalyq menshikke aınaldyrylǵan (túsken) múlikti esepke alý, saqtaý, baǵalaý jáne odan ári paıdalaný jónindegi jumystardy uıymdastyrý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Atalǵan qujat QR Prezıdentiniń quqyq qorǵaý qyzmeti men sot júıesiniń tıimdiligin arttyrý týraly tapsyrmasyn oryndaý maqsatynda ázirlengen. Bul rette zań jobasy boıynsha QR Joǵarǵy soty janyndaǵy Sot ákimshiligi jónindegi komıtettiń atqarýshylyq qujattardy oryndaý, jekelegen negizder boıynsha respýblıkalyq menshikke aınaldyrylǵan múlikti esepke alý sekildi fýnktsııalar men ókilettikterin Ádilet mınıstrligine berý kózdeledi. Qujatty qabyldaý azamattarǵa ózderiniń konstıtýtsııalyq quqyqtarynyń qorǵalýyna, sondaı-aq sot sheshimderiniń oryndalýyna qosymsha kepildikter beredi.
