Májilis atqarýshylyq is-júrgizýdi jetildirýge baǵyttalǵan qujatty maquldady
ASTANA. 13 qarasha. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Zań jobasynyń maqsaty atqarýshylyq is júrgizý salasyn retteıtin zańnamany jetildirý, sot oryndaýshylaryna boryshkerlerge áser etýdiń naqty tetikterin berý, sonymen birge sybaılas jemqorlyq kórinisterine yqpal etetin normalardy joıý bolyp tabylady. Budan bólek, qujatta usynylǵan ózgerister zańdy kúshine engen sot aktileriniń absolıýtti túrde oryndalýyna qol jetkizýdi qamtamasyz etýge baǵyttalady.
Sonymen birge, zań jobasy boıynsha sot oryndaýshylary jumysynyń tıimdiligin arttyrý maqsatynda olardyń ókilettiligin keńeıtý qarastyrylady.
Toqtala ketetin jaıt, búgingi kúni atqarýshylyq is júrgizý salasynda kúrdeli jaǵdaılar qalyptasqan. Máselen, qoldanystaǵy ınstıtýttar men quraldar Konstıtýtsııanyń sot aktilerin oryndalý mindetterin iske asyrylýyn qamtamasyz ete almaı keledi. Sondyqtan da, zań jobasy osyndaı olqylyqtardyń ornyn toltyrýǵa baǵyttalady.
