Májilis arnaıy ekonomıkalyq aımaqtar týraly zań jobasyn maquldady
ASTANA. 8 maýsym. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasyndaǵy arnaıy ekonomıkalyq aımaqtar týraly» zań jobasyn ekinshi oqylymda maquldady.
Atalǵan zań jobasy Qazaqstan Prezıdentiniń byltyrǵy jylǵy Joldaýyn júzege asyrýǵa baǵyttalǵan. Ol Joldaýda negizinen ındýstrııaldyq damýdyń basymdyqtary men arnaıy ekonomıkalyq aımaqtardyń jumys isteýiniń jańa tásilderin eskere otyryp, arnaıy ekonomıkalyq aımaqtar týraly jańa zań jobasyn ázirleý tapsyrylǵan bolatyn. Osyǵan oraı ázirlengen zań jobasynyń negizgi maqsaty elimizdegi arnaıy ekonomıkalyq aımaqtardy basqarý tıimdiligin arttyrý, rezıdentter úshin salyq zańnamasynyń turaqtylyǵyn qamtamasyz etý, olarǵa kepildikter berý bolyp tabylady. Arnaıy ekonomıkalyq aımaqtarda ruqsat etilgen qyzmet túrleriniń tizbesin keńeıtý sharalary da kózdeledi.
Budan bólek, zań jobasymen jekelegen kompanııalar-operatorlar men aımaqtar ákimshilikteriniń ornyna Úkimet, jergilikti atqarýshy organdar, sondaı-aq arnaıy ekonomıkalyq aımaqtardy basqarý tájirıbesi bar zańdy tulǵalardy olardyń quryltaıshylary bola alatyn aktsıonerlik qoǵamdar nysanyndaǵy basqarýshy kompanııalar qurý máseleleri kózdeledi. Sonymen qatar, arnaıy ekonomıkalyq aımaqtyń aýmaǵynda «bir tereze» qaǵıdaty boıynsha qyzmetter kórsetý tetigi engiziledi.
Zań jobasymen jumys barysynda depýtattar birqatar usynystar engizgen bolatyn. Atap aıtqanda, Astananyń erekshe mártebesin eskere otyryp, sondaı-aq «Astana - jańa qala» arnaıy ekonomıkalyq aımaǵy basqarý organynyń tıimdi jumys isteýiniń nátıjelerin eskere otyryp, depýtattar memlekettik basqarý júıesin jergilikti atqarýshy organ quzyretinde qaldyrýdy usyndy.
