Májilis Andreı Lınnıktiń depýtattyq ókilettigin merziminen buryn toqtatty

NUR-SULTAN. QazAqparat – Búgin Parlament Májilisiniń jalpy otyrysynda depýtat Andreı Lınnıktiń ókilettigi merziminen buryn toqtatyldy, dep habarlaıdy QazAqparat tilshisi.

«QR Parlamenti Májilisiniń depýtaty Andreı Lınnık mindetterin atqarýdan óz erkimen bosatý týraly ótinish berdi. Osyǵan oraı Ortalyq saılaý komıssııasy sizderdiń nazarlaryńyzǵa Konstıtýtsııanyń 52-babyna, «Parlament jáne onyń depýtattarynyń mártebesi týraly» Zańnyń 24-baby 3 jáne 8-tarmaqtaryna sáıkes, Májilis depýtaty Andreı Lınnıktiń ókilettigin merziminen buryn toqtatý týraly máseleni sheshý úshin usynym engizip otyr», - dedi Ortalyq saılaý komıssııasynyń múshesi Shavhat Ótemisov.

Jalpy otyrysta palata depýtattary atalǵan usynymǵa daýys berip, depýtattyń ókilettigin merziminen buryn toqtatý týraly sheshim qabyldady.

Andreı Lınnık 2021 jylǵy qańtardan bastap VII saılanǵan Qazaqstan Respýblıkasy Parlamenti Májilisiniń depýtaty boldy. Qazaqstannyń «Aq jol» demokratııalyq partııasy fraktsııasynyń múshesi.

Ashyq kózderden alynǵan foto