Májilis áleýmettik kásipkerlikti damytý týraly zań jobasyn maquldady

NUR-SULTAN. QazAqparat – QR Parlamenti Májilisinde «Qazaqstan Respýblıkasynyń keıbir zańnamalyq aktilerine áleýmettik kásipkerlikti damytý máseleleri boıynsha ózgerister men tolyqtyrýlar engizý týraly» Zań jobasy birinshi oqylymda maquldandy, dep habarlaıdy QazAqparat tilshisi.

«Bizdiń qoǵam erekshe qajettilikteri bar adamdardy jumysqa ornalastyratyn birlestikter men kásiporyndardyń jumysy boıynsha

kásipkerlik sýbektileriniń áleýmetke baǵyttalǵan qyzmetimen tanys. Qarjy mınıstrliginiń derekterine sáıkes, búginde osyndaı júzge jýyq sýbekt jeńildetilgen salyq salýdy paıdalanady. Sonymen birge, qyzmeti áleýmetke baǵyttalǵan uıymdar sheńberi áldeqaıda keń jáne olardyń sany jyl saıyn artyp keledi. Oǵan azamattyq qoǵamdy damytý jáne bıznestiń áleýmettik jaýapkershiliginiń jańa deńgeıi, sondaı-aq memlekettik-jekeshelik áriptestik júıesin nyǵaıtý men memlekettiń birqatar áleýmettik fýnktsııalaryn básekeles ortaǵa berý yqpal etýde», - dedi Májilis depýtaty Ekaterına Smyshlıaeva jalpy otyrysta.

Onyń aıtýynsha, qoldanystaǵy quqyq aıasy áleýmettik uıymdardyń keń aýqymdaǵy qyzmetin retteýge múmkindik bermeıdi. Ótken jyly kásipkerliktiń osy segmentin keńeıtý jáne odan ári nyǵaıtý úshin atalǵan Zań jobasy boıynsha jumys bastaldy. Oǵan bastamashy bolǵan sátten bastap áleýmettik bıznes ókilderi, qoǵamdyq birlestikter, kásibı qaýymdastyqtar, halyqaralyq sarapshylar tartylǵan.

Zańnyń negizgi jobasy úsh kodeks pen eki zańǵa ózgerister men tolyqtyrýlar engizýdi kózdeıdi.

«Zań jobasynda qarastyrylǵan múmkindikterdi iske asyrý arqyly:

- Erekshe qajettilikteri bar adamdardyń tynys-tirshiligin qamtamasyz etip, kedergisiz orta uıymdastyrý úshin medıtsınalyq tehnıka, arnaıy quraldar men basqa da otandyq taýarlardy óndirýshilerdi qoldaý jáne yntalandyrýǵa;

- Bıznesti ınklıýzıvtik jumysqa ornalastyrý, áleýmettik ońaltý, oqytý jáne ómirlik qıyn jaǵdaıǵa tap bolǵan azamattardyń osal sanattarynyń tabysyn arttyrý boıynsha problemalardy sheshýge tartýǵa;

- Kásipkerlik sýbektileriniń áleýmettik qorǵaý, densaýlyq saqtaý, bilim berý jáne mádenıet salasynda kórsetetin qyzmetiniń alýantúrliligi men sapasyn arttyrýǵa bolady», - deıdi E. Smyshlıaeva.

Zań jobasyn depýtattar birinshi oqylymda maquldady.