Májilis aldaǵy otyrysta Úkimet usynǵan bıýdjet jobasyna qorytyndy ázirleıtin ýaqytty naqtylaıdy
ASTANA. 17 mamyr. QazAqparat - Búgin Májiliste Palata spıkeri Nurlan Nyǵmatýlınniń tóraǵalyǵymen Bıýro otyrysy bolyp ótti.
Onda aldaǵy aptaǵa josparlanǵan palata jalpy otyrysynyń kún tártibiniń jobasy bekitildi. Bul týraly Májilistiń baspasóz qyzmetinen habarlandy.
Bıýro bekitken kún tártibine sáıkes, depýtattardyń qaraýyna «Qazaqstan Respýblıkasynyń Úkimeti men Belarýs Respýblıkasynyń Úkimeti arasyndaǵy dıplomatııalyq ókildikterdi ornalastyrý úshin jer ýchaskelerin ózara berý týraly kelisimdi ratıfıkatsııalaý týraly» zań jobasy shyǵarylatyn boldy. Sonymen birge Májilis «1992 jylǵy 25 mamyrdaǵy Qazaqstan Respýblıkasy men Reseı Federatsııasy arasyndaǵy dostyq, yntymaqtastyq jáne ózara kómek
týraly shartqa ózgerister engizý týraly hattamany ratıfıkatsııalaý týraly» zań jobasyn talqylaıtyn bolady.
Budan bólek, depýtattar jalpy otyrysta «2013 - 2015 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyna qorytyndy ázirleý ýaqytyn naqtylaıdy. Sonymen birge, «Qazaqstan Respýblıkasynyń keıbir zańnamalyq aktilerine saqtandyrý jáne ıslamdyq qarjylandyrý máseleleri boıynsha ózgerister men tolyqtyrýlar engizý týraly» zań jobasymen jumysty jalǵastyrý máselesin de qarastyratyn bolady.
