Májilis Ákimshilik quqyq buzýshylyq týraly kodeks jobasyn ekinshi oqylymda maquldady
ASTANA. QazAqparat - Búgin Parlament Májilisiniń jalpy otyrysynda palata depýtattary Ákimshilik quqyq buzýshylyq týraly kodeks jobasyn ekinshi oqylymda tutastaı maquldady.
Eske sala keteıik, kodeks jobasy ákimshilik zańnamany eleýli túrde reformalaýǵa baǵyttalady. Bul rette ákimshilik zańnamany izgilendirý, sottarǵa júktemeni azaıtý sharalary qarastyrylady. Osyǵan balanysty sottardyń jáne ákimshilik quqyq buzýshylyq týraly isterdi qaraýǵa ýákilettilik berilgen organdardyń quzyreti qaıta qaralady. Kodeks jobasyna sáıkes, aıyppuldyń absolıýttik belgili bir mólsheri kózdeledi. Bul ákimshilik jaza shyǵarý kezinde sybaılas jemqorlyq faktilerin joıýǵa múmkindik beredi. «Depýtattar zań jobasyn qaraý barysynda birqatar usynystar engizdi. Atap aıtqanda, Qylmystyq kodeks jobasyna buryn qylmystyq teris is retinde engizgen on qylmys quramdy kodeks jobasyna qaıtarýdy maquldady. Olardyń ishinde otbasylyq-turmystyq zań buzýshylyqtar, usaq alaıaqtyqtar, beıbit jınalystar men mıtıngter ótkizý tártibi týraly zańnamany buzý sekildi normalar bar», - deıdi depýtat Arman Qojahmetov. Onyń aıtýynsha, depýtattar quqyq buzýshylyqtyń jekelegen túrlerin jasaǵany úshin ákimshilik jazalaý túrinde qoldanylatyn ákimshilik qamaýǵa alý ınstıtýtyna qatysty túzetý engizgen.
