Májilis adamdardy qoǵamnan ýaqytsha oqshaýlaýdy qamtamasyz etýge baǵyttalǵan zań jobasyn maquldady
ANA. 15 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine adamdardy qoǵamnan ýaqytsha oqshaýlaýdy qamtamasyz etetin mekemelerde ustaý negizderin, tártibi men sharttaryn bekitý máseleleri boıynsha ózgerister men tolyqtyrýlar engizý týraly» zań jobasyn talqylady.
Esterińizge sala keteıik, Májilis maquldaǵan osy zań jobasyna Parlament Senaty birqatar ózgerister engizgen bolatyn.
Zań jobasynyń maqsaty - qazirgi ýaqytta qyzmeti zańǵa qosymsha normatıvtik quqyqtyq aktilermen retteletin arnaýly mekemelerde adamdardy ustaýdyń negizderi men tártibin zańnamalyq turǵydan bekitý bolyp tabylady.
Bul rette qujat boıynsha psıhıkalyq aýrýlardan zardap shegýshi adamdardy aýrýhanaǵa jatqyzýdyń, sondaı-aq alkogolızmnen, nashaqumarlyq pen ýytqumarlyqtan májbúrlep emdeý úshin mamandandyrylǵan mekemede ustaý negizderi men tártibi zańnamalyq turǵyda retteletin bolady. Budan bólek, ishki ister organdary arnaýly mekemeleriniń, atap aıtqanda tergeý ızolıatorlarynyń, ýaqytsha ustaý ızolıatorlarynyń, qabyldaý-bólý oryndarynyń, arnaýly qabyldaý ornynyń qyzmeti retteledi. Zań arqyly adamdardy arnaýly mekemelerde ornalastyrý negizderi, ustaý sharttary, olardyń quqyqtary men mindetteri, sondaı-aq ondaı azamattardy bosatý tártibi belgilenedi. Arnaýly mekemelerde ustalatyn adamdarǵa medıtsınalyq-sanıtarlyq qamtamasyz etý, bos ýaqyttaryn uıymdastyrý, oqytý bóliginde járdem kórsetý boıynsha qoǵamdyq birlestikterdiń ókilettikterin aıqyndaıtyn jańa baptar engiziledi.
Senat tarapynan redaktsııalyq naqtylaý sıpatyndaǵy ózgerister engizilgen.
