Májilis adam saýdasyna qarsy is-qımyl týraly zań jobasyn maquldady
«Adam saýdasyna qarsy is-qımyl týraly» zań jobasynda adam saýdasyna qarsy is-qımyldyń uıymdyq-quqyqtyq negizderin aıqyndaý, onyń ishinde adam saýdasyna qarsy is-qımyl salasyndaǵy ýákiletti organdardy, olardyń quqyqtary men mindetterin belgileý, uıǵarymdardy halyqaralyq standarttarǵa sáıkes keltirý, jańa uǵymdardy engizý, adam saýdasyna qarsy is-qımyl sýbektilerin jáne olardyń quzyretterin aıqyndaý, adam saýdasynyń táýekelderin baǵalaýdy engizý kózdelgen», - dedi depýtat Snejanna Imasheva Májilistiń jalpy otyrysynda.
Onyń aıtýynsha, «Qazaqstan Respýblıkasynyń keıbir zańnamalyq aktilerine adam saýdasyna qarsy is-qımyl máseleleri boıynsha ózgerister men tolyqtyrýlar engizý týraly ilespe zań jobasynda «Neke jáne otbasy týraly» kodekske, Qylmystyq jáne qylmystyq-protsestik kodeksterge, «Jábirlenýshilerge ótemaqy qory týraly» zańǵa, jetim balalar men ata-anasynyń qamqorlyǵynsyz qalǵan balalarǵa arnalǵan uıymdarǵa jáne prokýratýraǵa balalardyń saýdaǵa túsý faktileri týraly habarlaý jónindegi mindetterdi engizýge baǵyttalǵan ózgerister men tolyqtyrýlar engizý kózdelgen.
Sondaı-aq, adam saýdasyna baılanysty qylmystardyń tizbesin belgileý, jábirlenýshilerdi QR «Adam saýdasyna is-qımyl týraly» zańnamasyna sáıkes arnaýly áleýmettik qyzmetter alý quqyǵy týraly habardar etý, adam saýdasyna baılanysty jekelegen qylmystardy qosý da kózdelgen.
«QR adam saýdasyna qarsy is-qımyl máseleleri jónindegi ákimshilik quqyqbuzýshylyqtar týraly kodeksine tolyqtyrýlar engizý týraly» zańnyń ilespe jobasynda medıtsınalyq uıymdardyń, jetim balalar men ata-ana qamqorlyǵynsyz qalǵan balalarǵa arnalǵan uıymdardyń laýazymdy adamdarynyń jańa týǵan náresteni tastap ketý faktisi týraly habarlamaǵany úshin ákimshilik jaýapkershilik engizý jáne bala quqyqtaryn qorǵaý salasyndaǵy ýákiletti organnyń quzyretin aıqyndaý kózdeledi.
