Májilis 6 aptada 55 zań jobasyn maquldady - Q.Jaqypov
ASTANA. QazAqparat - Alty apta ishinde biz 55 zań jobasyn qarap, maquldadyq. Bul 20 jyldyq Májilis qyzmetiniń tarıhynda teńdessiz jumys boldy. Depýtattar da, Apparat ta joǵary jaýapkershilik pen jumyldyrylǵan rejımde jumys atqardy. Búgin Májilistiń jalpy otyrysy barysynda ótken aralyq jumystyń nátıjesine qorytyndy jasaǵan palata spıkeri Qabıbolla Jaqypov osylaı málimdedi.
«Elbasynyń zań jobalaryn 2016 jyldyń 1 qańtarynan bastap kúshine engizýdi depýtattar jedel, tııanaqty, kásibı túrde zań jobalaryn qarap, oryndady. Uıymdasqan túrde 6 jalpy otyrysta, Májilis Bıýrosynyń 7 otyrysynda bul zań jobalary talqylandy. Árıne, zań shyǵarmashylyǵynyń negizgi jumysy jumys toptary men bas komıtetterde ótti. Jumys toptarynyń 534 otyrysy, bas komıtetterdiń 22 keńeıtilgen otyrysy ótti. Kún saıyn jumys toptarynyń 30-ǵa tarta otyrystary ótti», - dedi spıker. Onyń aıtýynsha, Májilis qabyrǵasynda Úkimetten kelip túsken zań jobalarynyń sapasyn jaqsartýǵa baǵyttalǵan kóptegen túzetýler, ózgertýler usynyldy. Depýtattar shamamen 11 myńǵa tarta túzetý jasap, onyń jartysyna jýyǵy qoldaý tapqan. Osyǵan oraı, Májilis Tóraǵasy Úkimetke qoıan-qoltyq jumysy úshin rızashylyǵy men alǵysyn aıtty. «Osyǵan baılanysty tikeleı ózi de aınalysyp, bizge kómekteskeni úshin Premer-Mınıstr Kárim Másimovke de alǵysymdy aıtqym keledi», - dedi spıker.
