Májilis 2023-2025 jyldarǵa arnalǵan respýblıkalyq bıýdjet týraly zań jobasyn maquldady
QR Qarjy mınıstriniń mindetin atqarýshy Erjan Birjanovtyń aıtýynsha, zań jobasyn talqylaý barysynda birqatar túzetý engizildi.
«Túzetýlerdiń birinshi blogy depýtattar bastamashylyq jasap, halyqtyń ómir súrý sapasyn arttyrýǵa jáne óńirlerdi damytýǵa baǵyttalǵan. Máselen, halyqty taza sýmen qamtamasyz etýge, gazben jabdyqtaý júıesine, kólik ınfraqurylymyn damytýǵa, ınjenerlik-kommýnıkatsııalyq ınfraqurylymǵa, sondaı-aq densaýlyqty saqtaý obektilerin salýǵa qosymsha shyǵystar kózdelgen», - dedi E. Birjanov Májilistiń búgingi otyrysynda.
Jalpy, 2023 jyly óńirlerge respýblıkalyq bıýdjet qarajatynan 6,2 trln teńge bólinedi, bul jalpy bıýdjet shyǵystarynyń shamamen 29,4%-yn quraıdy.
Túzetýlerdiń ekinshi blogyn Úkimet usyndy jáne ol Prezıdent Joldaýy men onyń jekelegen tapsyrmalaryn qarjylaı qamtymasyz etýge baǵyttalǵan.
«Bul zeınetaqynyń ortasha mólsherin ósirýge, bir jarym jasqa deıingi bala kútimi boıynsha tólemder kezeńin ulǵaıtýǵa, Májilis pen máslıhat saılaýyn ótkizýge, jumyspen qamtýdyń belsendi sharalarymen qamtamasyz etýge jáne múgedek adamdardyń ómir súrý sapasyn jaqsartýǵa arnalǵan shyǵystar», - dedi Qarjy mınıstriniń mindetin atqarýshy.
«Biz jańa ǵana kelesi jyldarǵa arnalǵan negizgi qarjylyq qujatty qabyldadyq. Zań jobasy aıasynda Úkimetpen jáne memlekettik organdarmen birlesip, aýqymdy jumys atqaryldy. Respýblıkalyq bıýdjet jobasy memlekettiń barlyq áleýmettik mindettemelerin oryndaýǵa múmkindik beredi. Sondaı-aq, eldiń damý maqsattaryna da saı keledi. Kúrdeli geosaıası jaǵdaılar da eskerilgen. Prezıdent tapsyrmalaryn oryndaýǵa bul bıýdjet jobasynda erekshe mán berilip otyr», - dedi Májilis tóraǵasy Erlan Qoshanov.
Zań jobasyn talqylaýda Ulttyq ekonomıka mınıstri 2027 jylǵa deıingi munaı baǵasy, ınflıatsııa, eksport baǵalary men jalpy ishki ónim kólemine boljamdaryn aıtqan edi.
Sonymen birge, kelesi jyly respýblıkalyq bıýdjet kirisi artady.
