Májilis 2021 – 2023 jyldarǵa arnalǵan respýblıkalyq bıýdjet týraly qujatty maquldady
«Bıylǵy bıýdjet jobasyn qalyptastyrý álemdegi ekonomıkalyq ahýaldyń nasharlaýy men qolaısyz sanıtarııalyq-epıdemıologııalyq ahýal jaǵdaıynda júzege asyryldy. Makroekonomıkalyq kórsetkishterdi eskere otyryp, 2021 jylǵa arnalǵan respýblıkalyq bıýdjet túsimderi 11,4 trln teńge deńgeıinde boljanyp otyr. Bıýdjet tapshylyǵy 2021 jyly jalpy ishki ónimniń 3,4 paıyzynan 2023 jyly kezeń-kezeńmen 2,1 paıyzyna deıin tómendeýimen josparlanǵan», - dedi Qarjy mınıstri Erulan Jamaýbaev.
Onyń sózine qaraǵanda, shyǵystar 2021 jyly 14 trln teńgeni quraıdy. Bıýdjet jobasyn qalyptastyrý kezindegi basty qaǵıdat orta merzimdi kezeńge aıqyndalǵan baǵyttar men mindetterdi, sondaı-aq qabyldanǵan barlyq áleýmettik mindettemelerdi júıeli túrde iske asyrý boldy.
«Osylaısha, úsh jyldyq kezeńde áleýmettik salanyń shyǵystary 23,4 trln teńgeni, onyń ishinde 2021 jyly aǵymdaǵy jylmen salystyrǵanda 394 mlrd teńgege ulǵaıyp, 7,1 trln teńgeni quraıtyn bolady. Shyǵyndardyń jalpy kólemindegi áleýmettik salanyń úlesi kelesi jyly 50,4 paıyz bolady», - dedi mınıstr.
Ekonomıkanyń naqty sektoryn qoldaýǵa jáne damytýǵa arnalǵan shyǵystar orta merzimdi kezeńde 3,2 trln teńgeni quraıdy, onyń ishinde 2021 jyly 1,7 trln teńge bolady. Bul rette «Nurly jol», «Nurly jer», agroónerkásiptik keshendi damytý jáne basqa memlekettik baǵdarlamalardyń is-sharalaryn qarjymen qamtamasyz etý bıýdjettiń basym baǵyty bolyp qalady.
Zań jobasyn Májiliste talqylaý barysynda depýtattardyń usynystary boıynsha birqatar túzetýler engizildi. Túzetýlerdiń birinshi toby Memleket basshysynyń Joldaýyn, sondaı-aq onyń jekelegen tapsyrmalaryn qarjylyq qamtamasyz etýge baǵyttalǵan:
1) áskerı qyzmetshilerge azyq-túlik úlesteriniń qunyn ulǵaıtý;
2) aýyldyq eldi mekenderde feldsherlik-akýsherlik pýnktter salý;
3) Jumyspen qamtý jol kartasy aıasynda jekelegen jobalardy iske asyrýdy jalǵastyrý.
«Ekinshi top halyqtyń ómir súrý sapasyn arttyrýǵa jáne óńirlerdi damytýǵa baǵyttalǵan. Sondaı-aq, «Nur Otan» fraktsııasynyń otyrysynda aýyldyq eldi mekenderdi taza aýyz sýmen qamtamasyz etýge jáne gaz tasymaldaý ınfraqurylymyn damytýǵa arnalǵan shyǵystardy ulǵaıtý týraly sheshim qabyldandy. Osy baǵyttardy qarjylandyrý kózi saraptamalyq zertteýler júrgizý, jańa granttardy qarjylandyrý jáne kvazısektor sýbektilerine jiberiletin shyǵystardy ońtaılandyrý esebinen boldy. Túzetýler kezinde Esep komıtetiniń usynymdary eskerildi», - dedi E. Jamaýbaev.
2021 jyly óńirlerge respýblıkalyq bıýdjet qarajaty esebinen shamamen 4 trln teńge bólinetin bolady. Bul jalpy bıýdjet shyǵystarynyń 28 paıyzynan astamyn quraıdy.
«Túzetýlerdiń úshinshi toby Memleket basshysynyń jekelegen memlekettik organdardy qurý jáne qaıta uıymdastyrý jónindegi jarlyqtaryn iske asyrýǵa baǵyttalǵan. Bul rette, shyǵystardy ulǵaıtpaı, úsh jańa vedomstvonyń qyzmetin qamtamasyz etýge qarajat qaıta bólindi», - dedi mınıstr.
