Májbúrli qonǵan ushaqqa qatysty tekserý aıaqtaldy – Qorǵanys mınıstrligi

NUR-SULTAN. QazAqparat - QR Qorǵanys mınıstrliginde 2020 jyldyń 4 mamyrynda Qazaqstannyń Áskerı-áýe kúshteriniń S-295 ushaǵynda oryn alǵan tosyn oqıǵaǵa qatysty tekserý aıaqtaldy, dep habarlaıdy QazAqparat atalǵan vedmostvonyń baspasóz qyzmetine silteme jasap.

Tergeýdi Qorǵanys mınıstriniń buıryǵymen Airbus Military-ushaqty ázirleýshi kompanııa, sondaı-aq «Qazaqstan avıatsııalyq ındýstrııasy» JShS ókilderimen birlesip qurylǵan arnaıy komıssııa júrgizdi.

«Tekserý qorytyndysy boıynsha komıssııa avıatsııalyq oqıǵanyń sebebi shassıdiń aldyńǵy tireginiń dońǵalaqtaryn basqarý júıesiniń tehnıkalyq aqaýlyǵy boldy», - dedi QR Memlekettik avıatsııasynyń ushý qaýipsizdigin qadaǵalaý departamentiniń bastyǵy polkovnık Qaırat Baımahanov.

Shassıdiń aldyńǵy tireginiń shyqpaýyna baılanysty bolǵan shtattan tys jaǵdaıda ekıpaj aqaýdy joıý úshin qajetti barlyq jaǵdaıdy jasady. Áskerı ushqyshtardyń saýatty is-qımyldarynyń arqasynda áýe kemesi Jetigen aerodromyna sátti qona aldy.

Ekıpaj quramynda áýe kemesiniń komandıri maıor Jeńis Zaınýldınov – 1700 saǵattan astam ushýy bar 1-shi synypty ushqysh, kapıtannyń kómekshisi Abylaı Ibraev, bort-ınjener maıor Kárim Pahırdınov jáne bort-mehanık praporşık Igor Karabets boldy.

QR Prezıdenti – Qarýly Kúshterdiń Joǵarǵy Bas qolbasshysy sheshimimen S-295 ushaǵynyń ekıpajy memlekettik nagradalarmen marapattaldy. Atap aıtqanda maıor Jeńis Zaınýldınov jáne kapıtan Ablaı Ibraev – II dárejeli «Aıbyn» ordenderimen, maıor Kárim Pahırdınov jáne praporşık Igor Karabets – «Jaýyngerlik erligi úshin» medaldarymen.

Sondaı-aq, Qarýly Kúshter men Tótenshe jaǵdaılar komıtetiniń jerdegi qyzmetteriniń kásibı áreketteri atap ótildi. «Jetigen» aerodromyn ushaqtyń avarııalyq qonýyn qamtamasyz etýge aldyn ala daıyn bolýy, adam shyǵynynyń aldyn alýǵa jáne qymbat turatyn avıatsııalyq tehnıkany saqtaýǵa múmkindik berdi.

Qorǵanys mınıstriniń buıryǵymen ushaqtyń jerdegi avarııalyq qonýyn qamtamasyz etýde kásibılik tanytqan áskerı qyzmetshiler «El qorǵany» medaldarymen jáne Qurmet gramotalarymen marapattaldy.

Eske salsaq, Nur-Sultan-Aqtóbe baǵytyndaǵy áskerı ushaqtyń aldyńǵy shassıi ashylmaı, Jetigen aerodromyna aman-esen qonǵanyn habarlaǵanbyz.

Sondaı-aq, Qorǵanys mınıstrligi májbúrli qonǵan áskerı ushaqqa qatysty túsinik berdi.