Keıbir azamattar elimizdi mazaq qylýǵa áýestenip barady – Memleket basshysy
ASTANA. KAZINFORM — Úkimettiń jáne ákimderdiń qyzmeti óz halqymyzǵa da, syrtqy álemge de ashyq ári túsinikti bolýy kerek. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.
- Aqparattyq jumys ýaqtyly ári sapaly júrgizilgen jaǵdaıda kóptegen máseleni, sonyń ishinde qoǵamda dúrbeleń týdyrǵan túıtkilderdi ýshyqtyrmaı sheshýge bolatyn edi. Sondyqtan muqııat oılastyrylǵan qoǵamdyq kommýnıkatsııa strategııasy qajet. Úkimettiń jáne ákimderdiń qyzmeti óz halqymyzǵa da, syrtqy álemge de ashyq ári túsinikti bolýy kerek. Birinshi basshylar azamattardy jeke qabyldaýǵa tıis. Bul – óte mańyzdy. Ásirese, aımaq, qala, aýdan basshylary halyqpen tikeleı baılanysta jumys isteýi qajet. Degenmen memleket pen qoǵamnyń seriktestigi azamattarǵa da zor jaýapkershilik júkteıdi. Sońǵy kezde zań ústemdigine jáne qoǵamdyq tártiptiń saqtalýyna basymdyq berý qajettigi damyǵan elderde, tipti, AQSh-tyń ózinde jıi aıtyla bastady. Biz mundaı paıymǵa áldeqashan kelgenbiz, - dedi Qasym-Jomart Toqaev.
Prezıdent «zań men tártip» qaǵıdasy halyqtyń sanasyna tereń ornyǵýǵa tıis ekenin atap ótti. Ol úshin kez kelgen quqyq buzýshylyqqa «múldem tózbeýshilik» qaǵıdasyn berik ustaný qajet. Bul baǵyttaǵy jumystar barlyq deńgeıde uıymdastyrylýy kerek.
- Muny, ásirese, aımaq ákimderi myqtap qolǵa alǵany jón. Biraq shekteýler men aıyppuldarǵa qatysty memlekettiń de, qoǵam belsendileriniń de ustanymy kóńilge qonymdy bolýǵa tıis. Májbúrleý sharalary bolmasa, tártip ornatý múmkin emes ekenin álemdik tájirıbe kórsetip otyr. Sondyqtan memlekettiń is-áreketterine túsinistikpen qaraǵan jón. Bul oraıda dıalog arqyly qoǵamdyq kelisimge kelý kerek. Qalaı desek te, memleket zań tártibin qamtamasyz etý úshin qabyldaıtyn sharalar óz elin kústánalaýǵa sebep bolmaýǵa tıis. Keıbir azamattar elimizdi mazaq qylýǵa áýestenip barady. Mysaly, ózge elderdiń ókilderi joq jerden «keremet jetistikterdi, tabystardy» taýyp alyp, ony shetelge jan-jaqty nasıhattap jatady. Al bizdiń azamattar, olardyń ishinde shoý-bıznes ókilderi, ózin ózi «qoǵam belsendisi» sanaıtyn jastar, tipti, depýtattar da bar, Qazaqstanǵa neshe túrli laqap at qoıatyn boldy. Bul endi múldem túsiniksiz, aqylǵa syımaıtyn nárse, - dedi Memleket basshysy.
Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
Otyrysta Prezıdent Úkimettiń áleýmettik kómek máselesine kelgende tym saqtyq tanytyp otyrǵanyn atap ótti.