Májbúrlep óndirýdi toqtatý barysynda qandaı sharaldar qabyldanǵany jarııalandy

NUR-SULTAN. QazAqparat – Memlekettik kirister komıteti 22 sáýirden bastap májbúrlep óndirý tásilderi men sharalaryn tótenshe jaǵdaı kezeńinde ýaqytsha toqtatý barysynda qandaı jumystar atqarylǵanyn jarııa etti, dep habarlaıdy QazAqparat Qarjy mınıstrligi Memlekettik kirister komıtetiniń baspasóz qyzmetine silteme jasap.

Birinshi - 54,9 myń salyq tóleýshige barlyq salyqtary boıynsha merziminde oryndalmaǵan salyq mindettemeleri boıynsha ósimpuldardy esepteý 2020 jylǵy 15 tamyzǵa deıin toqtatyldy.

QR Úkimetiniń 2020 jylǵy 20 naýryzdaǵy №126 qaýlysyna sáıkes, 2020 jylǵy 15 tamyzǵa deıin: Jer salyǵynan bosatylǵan aýyl sharýashylyǵy ónimin óndirýshilerdiń; múlik salyǵynan bosatylǵan iri saýda obektileri, saýda-oıyn-saýyq ortalyqtary, kınozaldar, teatrlar, kórmeler men dene shynyqtyrý-saýyqtyrý jáne sport ǵımarattary boıynsha zańdy tulǵalar men jeke kásipkerlerdiń barlyq salyǵynyń ósimpuldary eseptelmeıdi.

Ekinshi - 34,9 myń salyq tóleýshiniń bank shottary boıynsha shyǵys operatsııasyn toqtata turý týraly 158 757 ókim keri qaıtaryldy,
88,2 myń salyq tóleýshiniń múlikti paıdalanýǵa shekteý qoıý týraly 200 083 ókimniń kúshi ýaqytsha toqtatyldy.

QR Úkimetiniń 2020 jylǵy 27 naýryzdaǵy №141 qaýlysyna sáıkes, mıkro, shaǵyn nemese orta kásipkerlik sýbektilerine, táýekel dárejesi joǵary salyq tóleýshilerdi qospaǵanda, merziminde oryndalmaǵan salyq mindettemesin oryndaýdy qamtamasyz etý sharalaryn qoldaný 2020 jylǵy 1 maýsymǵa deıin toqtatylǵan bolatyn.

Úshinshi - 34,9 myń salyq tóleýshiniń bank shottary boıynsha 301 638 ınkassalyq ókimderi keri qaıtaryldy, 13,0 myń salyq tóleýshiniń múlikterine jasalǵan 64 852 tizimi boıynsha múlkin ótkizý ýaqytsha toqtatyldy.

QR Úkimetiniń 2020 jylǵy 27 naýryzdaǵy №141 qaýlysyna sáıkes, mıkro, shaǵyn nemese orta kásipkerlik sýbektilerine táýekel dárejesi joǵary salyq tóleýshilerdi qospaǵanda, salyq jáne keden bereshegin, sondaı-aq áleýmettik tólemder boıynsha bereshekti májbúrlep óndirip alý sharalaryn qoldaný 2020 jylǵy 1 maýsymǵa deıin toqtatylǵan edi.