Majarstannyń Qazaqstandaǵy Elshisi dıplomatııalyq mıssııasyn aıaqtady
NUR-SULTAN. QazAqparat- Qazaqstan Respýblıkasynyń Syrtqy ister mınıstri Beıbit Atamqulov bizdiń eldegi dıplomatııalyq qyzmetiniń aıaqtalýyna baılanysty Majarstannyń Tótenshe jáne Ókiletti Elshisi Andrash Baranıdi qabyldady. Bul týraly QazAqparat SІM baspasóz qyzmetine silteme jasap habarlaıdy.
Syrtqy saıası vedomstvo basshysynyń aıtýynsha, majarstandyq dıplomat ekijaqty qarym-qatynastardy nyǵaıtý jolynda jemisti ister atqardy. Onyń jarqyn kýási Qazaqstan men Majarstan arasyndaǵy joǵary deńgeıdegi baılanystardyń qarqyndylyǵynyń artýy.
«Bizdiń elder strategııalyq áriptestik ornaýynyń 5-jyldyǵyn atap ótti. Ózara qurmet pen ózara tıimdi yntymaqtastyq negizinde qalyptasqan ekijaqty is-qımyldardyń budan bylaı da jandanýy úshin barlyq kúsh-jigerimizdi salýymyz kerek», - dedi mınıstr.
Majarstan qazaqstandyq bastamalarǵa qoldaý kórsetkeni, sondaı-aq turaqty konsýltatsııalar ótkizý arqyly eki jaqty salalarda jáne halyqaralyq arenada yntymaqtastyqty odan ári nyǵaıtýǵa degen nıeti úshin A.Baranıge rızashylyq bildirildi.
SІM basshysy Majarstan Elshisine onyń budan ári jalǵasatyn dıplomatııalyq qyzmetine tabystar tilep, ol árqashanda Qazaqstanda qurmetti qonaq ekendigin atap ótti. Majarstan Premer-mınıstriniń sheshimimen A.Baranı Syrtqy ister jáne ekonomıkalyq baılanystar mınıstrligi Memlekettik hatshysynyń orynbasary laýazymyna taǵaıyndaldy.
