Majarstannyń OTP Bank-i Qazaqstan naryǵyna kiredi

ASTANA. KAZINFORM — Astana halyqaralyq qarjy ortalyǵynda Qazaq-majar ınvestıtsııalyq qory qurylady. Bul týraly búgin Aqordada Qazaqstannyń Majarstandaǵy Tótenshe jáne Ókiletti Elshisi Abzal Saparbekuly aıtty.

- Búginde Majarstannyń birneshe iri kompanııasymen kelissóz jalǵasyp jatyr. Onyń ishinde Majarstannyń qarjy salasyndaǵy eń úlken banki - OTP Bank-tiń Qazaqstan naryǵyna kirýine qatysty kelissóz bar. Sonymen qatar Majarstannyń telekommýnıkatsııa, ǵarysh salasyndaǵy tehnologııalyq ІT kompanııasynyń Qazaqstanǵa sapary ótti. Sol sapar barysynda «Qazaqstan ǵarysh saparymen», «Qazaqtelekommen» ortaq jobalar, qorǵanys salasynda ortaq joba jasaý boıynsha kelissóz bastaldy. Munan bólek munaı-gaz salasyndaǵy MOL kompanııasy elimizdiń gaz salasyna qomaqty ınvestıtsııa salý boıynsha kelissóz júrgizip jatyr, - dedi ol BAQ ókilderine bergen suhbatynda.

Onyń atap ótýinshe, aldaǵy ýaqytta Majarstannyń atom energetıkasy salasyndaǵy MVM kompanııasynyń Qazaqstanǵa sapary ótedi. Bul kompanııamen atom, energetıka, ınfraqurylym salasynda birqatar ortaq joba qarastyrý josparlanyp otyr.

- Taǵy bir úlken joba – Majarstanda úlken kólik-logıstkalyq hab qurý. Ótken jyly sondaı kelisim bolǵan edi. Soǵan oraı «QTJ Ekspress» kompanııasynyń majarlyq kompanııamen kelissózderi jalǵasyp jatyr. Oǵan qytaı taraby da qatysady. Bul boıynsha jaqyn arada ortaq memorandýmǵa qol qoıylatyny kútiledi. Árıne, eń bastysy – Qazaq-majar ınvestıtsııalyq qoryn qurý. 100 mln dollarlyq ınvestıtsııalyq qor boıynsha kelissózder aıaqtaldy dep esepteýge bolady. Jaqyn arada osy ınvestıtsııalyq qordy Astana qarjy ortalyǵynda qurý jónindegi kelisimge qol qoıylmaq, - dedi Abzal Saparbekuly.

Aıta keteıik, Aqordada Memleket basshysy Qasym-Jomart Toqaev elimizge resmı saparmen kelgen Majarstan Prezıdenti Tamash Shýıokty qarsy aldy.