Majarstannyń Qazaqstanǵa quıǵan ınvestıtsııasy 370 mıllıon dollarǵa jetti – dóńgelek ústel
BÝDAPEShT. KAZINFORM – Prezıdent Qasym-Jomart Toqaev Qazaq-majar ınvestıtsııalyq dóńgelek ústeline qatysty, dep habarlaıdy Aqorda.
Memleket basshysy, eń aldymen, eki el arasyndaǵy ekonomıkalyq qarym-qatynas qarqyndy damyp kele jatqanyn atap ótip, Býdapeshtke alǵashqy memlekettik sapary qazaq-majar strategııalyq seriktestiginiń jańa kezeńine jol ashatynyn jetkizdi.
– Bıyl Qazaqstan men Majarstannyń Strategııalyq seriktestik týraly deklaratsııaǵa qol qoıǵanyna 10 jyl toldy. Osy ýaqyt aralyǵynda biz ózara senim men ortaq maqsattarǵa negizdelgen tyǵyz yntymaqtastyqtyń irgesin qaladyq. Majarstannyń Qazaqstanǵa quıǵan ınvestıtsııasy 370 mıllıon dollarǵa jetti. Elimizde majarlardyń 70-ten astam kompanııasy tabysty jumys istep jatyr. Olardyń qatarynda MOL Group jáne Gedeon Richter sekildi kompanııalar bar. Qazirgi tańda mashına jasaý, aýyl sharýashylyǵy jáne logıstıka salalarynda jalpy ınvestıtsııa kólemi 540 mıllıon dollardan asatyn birlesken jobalardy júzege asyrý máselesi pysyqtalyp jatyr, – dedi Prezıdent.
Memleket basshysy Qazaqstan jańa saıası jáne ekonomıkalyq paradıgmaǵa bet burǵanyn aıtty. Bilim men ınnovatsııany tý etken ózgerister bul úderistiń basty qaǵıdatyna aınalady.
Prezıdent Majarstan bıznesmenderine energetıka, sırek kezdesetin materıaldardy óndirý, kólik jáne logıstıka, aýyl sharýashylyǵy, farmatsevtıka, tsıfrlandyrý, qarjy naryǵy sekildi mańyzdy salalarda ınvestıtsııalyq yntymaqtastyqty nyǵaıtýdyń keleshegi zor ekenin málimdedi.
Qasym-Jomart Toqaev sózin qorytyndylaı kele, majar kompanııalarynyń basshylaryn kelesi jyly mamyr aıynda ótetin Astana halyqaralyq forýmyna qatysýǵa shaqyrdy.
Investıtsııalyq dóńgelek ústel barysynda Majarstannyń Qarjy mınıstri, Qazaq-majar ekonomıkalyq yntymaqtastyǵy jónindegi úkimetaralyq komıssııanyń teń tóraǵasy Mıhaı Varga men iri kompanııalardyń jetekshileri sóz sóıledi.
Jıyn qorytyndysy boıynsha aýyl sharýashylyǵy, kólik ınfraqurylymyn tsıfrlandyrý, bilim salalaryna jáne birlesken ınvestıtsııalyq jobalardy qoldaýǵa qatysty 7 kommertsııalyq qujatqa qol qoıyldy.
Osyǵan deıin Memleket basshysy Majarstan Prezıdenti Tamash Shýıokpen kezdesti.
