Majarstandyq ınvestorlar Qazaqstanda birneshe quramajem zaýytyn salady
ASTANA.KAZINFORM - Aýyl sharýashylyǵy mınıstri Aıdarbek Saparov UBM Group dırektorlar keńesiniń tóraǵasy Akosh Vargamen kezdesti.
Mınıstrlik málimetinshe, kezdesýge sondaı-aq Majarstannyń Qazaqstandaǵy elshisi Otto Ivan Rona qatysty. Eske sala keteıik, UBM Group Qazaqstanda birneshe quramajem zaýyty men premıks zaýytyn salýdy qamtıtyn ınvestıtsııalyq baǵdarlamany iske asyryp jatyr.
– Birneshe aı boıy sizder barlyq máseleni egjeı-tegjeıli taldap, zaýyttar salynatyn óńirlerdi aıqyndap, negizgi seriktestikterdi qalyptastyrdyńyzdar. Búgin sizder eldiń azyq-túlik qaýipsizdigin nyǵaıtyp, zamanaýı óndiristik qýattylyǵy zor aýqymdy jobany iske asyrýǵa kiristińizder.
Bul jobalar agroónerkásiptik keshendi jańǵyrtýda jáne Qazaqstan men Majarstan arasyndaǵy strategııalyq yntymaqtastyqty damytýda mańyzdy ról atqarady, - dedi Aıdarbek Saparov.
Akosh Varga kompanııa úshin Qazaqstannyń strategııalyq mańyzy zor ekenin atap ótti.
– Biz Qazaqstannyń jemshóp ónerkásibin ornyqty damytý úshin sapasy myqty, tıimdiligi joǵary zamanaýı kásiporyndar qurýdy maqsat etemiz. Jobalardy júzege asyrý barysynda kórsetilip jatqan jan-jaqty qoldaýyńyz úshin alǵys bildiremiz. Bul biz úshin óte qundy, - dedi ol.
Jylyna 100 myń tonna ónim óndiretin quramajem zaýytyn salý jobasyn Qostanaı oblysynda UBM Group pen «Eco Broiler Ltd» JShS birlesip júzege asyrady. Al Almaty oblysynda jylyna 48 myń tonna ónim shyǵaratyn premıks zaýytyn «KazFoodProducts» JShS-men birlesip salý josparlanyp otyr. Qurylys 2026 jyly bastalady dep josparlanǵan.
Kezdesý qorytyndysy boıynsha UBM Group jáne «Eco Broiler Ltd» JShS ókilderi Qazaqstanda premıks, kontsentrat jáne quramajem óndiretin kásiporyndar jelisin qurýǵa baǵyttalǵan UBM Group baǵdarlamasyn birlesip iske asyrý jóninde ózara túsinistik týraly memorandýmǵa qol qoıdy. Baǵdarlama ishki naryqty da, Ortalyq Azııa elderine eksportty da qamtıdy.
Sonymen qatar, uzaqmerzimdi damý strategııasy aıasynda Qostanaı oblysynda jylyna 216 myń tonna ónim óndiretin iri quramajem zaýytyn salý kózdelip otyr.
Ónimniń negizgi tutynýshylary – Eco Broiler kompanııasynyń tik ıntegratsııalanǵan qurylymdary men óńirdiń fermerlik jáne mal sharýashylyǵy. Zaýyttyń birinshi kezeńin 2026 - 2030 jyldary qolǵa alý kózdelgen.
Aıta keteıik, Qazaqstan men Majarstan ózara taýar aınalymyn 1 mlrd dollarǵa jetkizbek.