Majarstandaǵy qazaqstandyq stýdentter úshin stıpendııalyq baǵdarlamanyń merzimi uzarady

ASTANA. QazAqparat – Majarstanda bilim alatyn qazaqstandyq stýdentter úshin «Stipendium Hungaricum» stıpendııalyq baǵdarlamasynyń merzimi uzarady. Bul týraly BAQ ókilderiniń qatysýymen ótken brıfıngide Syrtqy ister mınıstriniń orynbasary Roman Vasılenko málimdedi, dep habarlaıdy QazAqparat tilshisi.

«Syrtqy ister mınıstrligi halyqaralyq akademııalyq baılanystardy keńeıtý, birqatar birlesken bilim berý jáne mádenı bastamalardy iske asyrý jónindegi jumysty jalǵastyrýda. Osylaısha, vengrııalyq tarappen qazaqstandyq stýdentter úshin «Stipendium Hungaricum» vengrııalyq stıpendııalyq baǵdarlamasyn uzartý týraly ýaǵdalastyqqa qol jetkizildi. Sondaı-aq, Qazaqstan «Erasmus+» jáne «Horizon Europe» sııaqty akademııalyq jáne ǵylymı almasýdyń mańyzdy baǵdarlamalaryna odan ári qatysýǵa múddeli», - dedi Roman Vasılenko.

Onyń dereginshe, qazir Qazaqstanda 5 sheteldik joǵary oqý oryndarynyń fılıaldary jumys isteıdi. Sonymen qatar, taıaýda Shotlandııanyń Herrıot-Ýott ýnıversıtetiniń Aqtóbe óńirlik ýnıversıtetiniń bazasynda fılıalyn ashý josparlanýda.