Majarstandaǵy stýdentter saǵatyna 1672-3500 forınt tabys tabady

ASTANA. KAZINFORM — Majarstanda stýdentterdiń jumyspen qamtylýy jaz aılarynda ádettegideı eń joǵary deńgeıge jetedi, degenmen jastarǵa degen suranys jyl boıy saqtalady, dep jazady AZERTADJ.

BBJ basylymynyń saýalnama nátıjelerine sáıkes, osy jazda elde shamamen 120 myń stýdent eńbek etip júr. Maýsymdyq jumystyń eń kóp shoǵyrlanǵan jeri — Balaton óńiri. Al jumys salalary boıynsha — ónerkásipte suranys joǵary, sebebi bul kezeńde qyzmetkerlerdiń kóbi demalysqa shyǵady. Sonymen qatar on myńdaǵan stýdent saýda men qyzmet kórsetý salalarynda turaqty túrde jumys isteıdi.

Stýdentterge arnalǵan eń tómengi saǵattyq jalaqy — 1672 forınt (1 eýro = 401 forınt). El boıynsha ortasha jalaqy 1672–2000 forınt aralyǵynda, al Býdapeshtte — 2300 forıntqa deıin jetedi. Al ınjenerııa men IT salasynda saǵattyq tólem 3000–3500 forıntqa deıin barady.

Prodiák stýdenttik kooperatıviniń dereginshe, jaz mezgilinde týrızm men qonaqúı bıznesi salasyna degen suranys 35–40% shamasynda. 

— Maýsym men tamyz aralyǵynda stýdentter Balaton kóliniń mańynda jappaı jumys isteıdi — kafe, barlar, jaǵajaılar men festıvalderde. Keıbir qalalarda olar maýsymdyq jumys kúshiniń 70%-yna deıingi úlesin quraıdy, — dedi kooperatıv basshysy Rozalııa Tot.

Týrızm men qonaqjaılylyq salasyndaǵy ortasha saǵattyq jalaqy — 2300 forınt.

Rozalııa Tottyń aıtýynsha, maýsymdyq jumystyń qyzǵan shaǵynda da kadr jetispeýshiligi únemi baıqalatyndyqtan, stýdentter jyl boıy suranysqa ıe jumys kúshi bolyp qala beredi.

Osydan buryn habarlanǵandaı, Majarstan pasporty álemdegi eń myqty 7 qujattyń qataryna kirdi.