Majarstandaǵy sheteldik jumysshylar qansha tabys tabady
ASTANA. KAZINFORM — Majarstan — eńbek mıgranttary úshin tanymal elderdiń biri, sebebi mundaǵy tabys olardyń otanyndaǵy jalaqydan áldeqaıda joǵary, dep habarlaıdy AZERTADJ.
Mysaly, Fılıppınde ortasha jalaqy Majarstandaǵy eń tómengi jalaqynyń úshten ekisine teń. Sondyqtan fılıppındik eńbek mıgranttary Majarstandaǵy jalaqylaryn maqtan tutady. Degenmen bul jerde olardyń aqshasy Eýropalyq Odaqtyń basqa elderinde tabatyn jalaqydan áldeqaıda tómen. Biraq eńbek mıgranttary Majarstanda qansha tabys taba alady?
Majarstanda biliktilikti qajet etpeıtin tolyq jumys kúnine eń tómengi jalaqy shamamen 290 800 forınt (shamamen 721 eýro), al orta mektep dıplomyn qajet etetin jumys úshin shamamen 348 800 forınt (shamamen 865 eýro) tólenedi. Bul — salyq salynbaǵan somalar. Buǵan deıin zaýyttarda jumys isteıtin fılıppındik jumysshylardyń aıyna shamamen 550 eýro kóleminde taza jalaqy alatyny habarlanǵan. Bul ótken jyly olardyń otanymen salystyrǵanda tartymdy eńbekaqy sanalǵan. Majarstandaǵy ortasha aılyq brýtto jalaqy — 661 400 forınt (shamamen 1 647 eýro), al medıanalyq brýtto jalaqy — 560 900 forınt (shamamen 1 391 eýro).
Balalary bar nemese kópbalaly majarlar úshin otbasylyq salyqtyq jeńildikter taza jalaqyny aıtarlyqtaı arttyrady. Alaıda úkimettik ózgeristerge baılanysty, úshinshi elderden kelgen eńbek mıgranttary (Serbııa men Ýkraına azamattarynan basqa) endi otbasylyq salyq jeńildikterine, alǵashqy nekedegi jastarǵa arnalǵan jeńildikterge jáne 25 jasqa deıingi qyzmetkerlerge arnalǵan salyqtyq jeńildikterge ıe bola almaıdy. Bul olardyń majarlyq áriptesterine qaraǵanda taza jalaqysynyń 10–15 paıyzǵa tómen bolýyna ákeledi, ásirese otbasyly adamdar úshin.
Majarstanda barlyq jumysshy 15 paıyzdyq tabys salyǵyn jáne 18,5 paıyzdyq áleýmettik saqtandyrý qoryna jarna tóleýge mindetti. Osylaısha, taza jalaqy — bul brýtto jalaqydan 33,5 paıyzdy alyp tastaǵandaǵy soma. Eger úshinshi elden kelgen jumysshy (ýkraınalyqtar men serbterden basqa), tipti onyń úsh nemese odan da kóp balasy bolsa da aıyna 450 000 forınt (shamamen 1 116 eýro) brýtto jalaqy alsa, ol aıyna 299 250 forınt (shamamen 744 eýro) taza jalaqyǵa ıe bolady.
Qorytyndylaı kele, eńbek mıgranty Majarstanda majarlyq áriptesimen birdeı laýazymda jumys istegen jaǵdaıda, sol mólsherde brýtto jalaqy alýy tıis. Bul somaǵa tek eńbek ótili áser etýi múmkin. Alaıda, tek ýkraınalyq jáne serbııalyq mıgranttar salyqtyq jeńildikterge ıe bola alatyndyqtan, majarlyq qyzmetkerlerdiń taza tabysy keı jaǵdaıda aıtarlyqtaı joǵary bolady. Bul aıyrmashylyq balalary bar otbasylar jaǵdaıynda tipti ulǵaıa túsedi, óıtkeni Majarstan úkimeti 2026 jyldyń 1 qańtarynan bastap qazirgi salyq jeńildigin eki eseleıdi.
Buǵan deıin Majarstandaǵy 50-ge jýyq eldimekende qazaq ultynyń ókilderi turatyny belgili boldy.